Faqja e Agjencisë së Prokurimeve Publike prej ditësh ka qenë subjekt kritikash të pafundme, për shkak se në një kohë kur vendi ndodhet në prag të një krize shëndetësore e ekonomike, institucionet publike shqiptare vijonin tenderat e pakuptimtë për blerjen e shërbimeve apo produkteve që nuk kanë asnjë vlerë në një moment të tillë.
Prej javësh “iconstyle.al” ka theksuar rëndësinë e pezullimit të këtyre tenderave, që do të lehtësonin drastikisht barrën e sistemit shëndetësor dhe ekonomisë shqiptare, në një kohë kur laku duket se po ngushtohet gjithnjë e më shumë.
E njëjta thirrje është bërë së fundmi dhe nga opozita dhe duket se qeveria shqiptare më në fund ka marrë masa.
Në një njoftim të publikuar ditën e sotme, Agjencia e Prokurimeve Publike ka bërë të ditur se do të pezullohet çdo procedurë që nuk lidhet ngushtësisht me emergjencën e shkaktuar nga pandemia e COVID-19.
“Në kuptim të sa më sipër, autoritetet kontraktore të pezullojnë gjitha procedurat e prokurimit, përfshirë këtu edhe procedurat e prokurimit me vlerë të vogël, për objekte prokurimi të cilat nuk lidhen ngushtësisht me këtë situatë, deri në një njoftim të dytë.”-thuhet në njoftimin e APP.
Në kuadër të kësaj mase gjithashtu është njoftuar se është pezulluar dhe puna për procedurat që janë në proces e që nuk lidhen me situatën e krijuar nga koronavirusi.
Pezullimi i këtyre procedurave ka prekur dhe prokurimet për nevojat që lidhen me riparimin e dëmeve të shkaktuara nga tërmeti, për rindërtimin e mijëra shtëpive dhe apartamenteve për ata që kanë mbetur të pastrehë apo për rindërtimin e shkollave, në të cilat nuk dihet ende se kur do të rifillojë mësimi.
