Më 24 korrik të këtij viti, Bujar Nishani dorëzon karrigen e Presidentit në të cilën pas seancës së betimit, do të ulet Ilir Meta. Kreu i shtetit ishte i ftuar në emisionin “Komiteti”, ku rrëfeu pengun që i kishte mbetur në 5 vite drejtimi të Presidencës.
Nishani thotë se së fundi ka gjetur kohën të zhvillojë takime të shumta me qytetarët anembanë Shqipërisë dhe pikërisht këtu ka zbuluar edhe pengun e tij.
“Duhej të kisha pasur kontakte më të shpeshta me qytetarët, jo vetëm punë në zyrë”, tha Nishani.
Presidenti tregoi planin e tij pas lënies së mandatit. “Pushime me familjen”, tha Nishani, i cili u shpreh se dëshiron të kalojë disa ditë të qeta me familjarët e tij.
