Paraqitjet më të bukura nga darka me gazetarët në Shtëpinë e Bardhë (VIDEO)

Disa nga më të mirët e “Hollywood”-it, por edhe celebrities jashtë tij, u mblodhën në natën e fundit të prillit në Uashington, për të festuar Darkën për Korrespondentët e Shtëpisë së Bardhë. Ndërsa stili i tyre tërhoqi vëmendjen e të gjithëve.

Emma Watson triumfoi me paraqitjen e saj në tapetin e kuq, një fustan me lule që theksohej nga pantallonat ngjyrë blu të veshura poshtë. Modelja Kendall Jenner u shfaq e veshura e gjitha në të zeza, Adriana Lima zgjodhi ngjyrën e kuqe, ndërsa Emily Ratajkowski një fustan me dizajno në ngjyrat e tokës.

Ndërsa Helen Mirren duket se vodhi shfaqen duke treguar një homazh për Prince. Aktorja 70-vjeçare veshi një fustan të gjatë ngjyrë lejla, ndërsa e theksoi me një tatuazh të përkohshëm me po të njëjtën ngjyrë që tregonte simbolin e ikonës së pop-it.

Ndërsa Obama tërhoqi të gjithë vëmendjen me fjalimin e tij, duket se pas tij moda fitoi. Në darkën e përvitshme ku ishin të pranishëm rreth 3000 të ftuar, presidenti Barack Obama ishte padyshim ylli i mbrëmjes. Batutat e tij brilante argëtuan të pranishmit, në darkën që është bërë traditë në SHBA që prej vitit 1920, dhe mbushën faqet e gazetave në të gjithë botën.

Gjatë fjalimit të tij, presidenti Obama, i cili e mbaron detyrën pas pak muajsh, vendosi në shënjestër edhe kandidatët për president, Hillary Clinton dhe Donald Trump. Presidenti përfundoi Darkën e tij të fundit të korrespondentëve në Shtëpinë e Bardhë me një falënderim për korrespondentët, duke përfunduar me fjalët: “Obama jashtë”, duke ia lënë fjalën komedianit Larry Wilmore.

Burimi: Harper’s Bazaar