“Day n’ Night”, eventi që mbledh DJ-të më të mirë për 12 orë

Fundjava dhe festa, shkojnë bashkë si birra me kikirikët. Jeta e natës, një patentë për të ngarë veten drejt ca lirive të vogla, ku me kalimin e kohës kupton se të është bërë shprehi. Ka plot prej nesh që mezi presin muzgun e së premtes dhe mbrëmjet e së shtunës për të qenë aty, tek zhurma, miqtë, flirtet, pijet, muzika. Po për ca kjo është PUNË. Të jetosh duke bërë festa, është ironi e ëmbël për ata që u bie ky “hall” dhe lakmi për gjumashët e të hënës në mëngjes.

Aldo Skënderi, organizatori i eventeve, është ai që “gradon” argëtimin për ndjekësit që e dinë se aty festa është e sigurt. Edhe këtë vit ai organizon eventin e radhës të Day ‘n Night. Ky është një aktivitet social-kulturor në ndihmë të jetës rinore në kryeqytet, duke u munduar të krijojë një traditë të përvitshme, pak më ndryshe nga aktivitet e krijuara deri tani, pasi në qendër të vëmendjes nuk do jetë thjesht festa, por do ketë dhe një konotacion të fortë social si dhe në një fare mënyre krijimin e poleve të reja ku të rinjtë mund të kalojnë kohën e lirë.

Gjithashtu në të njejtën kohë do jetë në qendër të vëmendjes përqendrimi të çështje të ndryshme sociale me karakter bamirës siç ishte aktiviteti i krijuar në bashkëpunim me shoqatën DSA (down syndrome albania) dhe në ndihmë të “Shtëpisë së Fëmijëve Zyber Hallulli”. Eventi organizohet më 15 maj në harkun e 12 orëve pa ndalim, nën muzikën e DJ-ve më të famshëm në vend, të cilët i janë bashkuar kësaj kauze. DJ-të që marrin pjesë në këtë aktivitet janë: Rei, Olti, Juri, Gento, Positive, Sardi, Boocky, DJ Vicky & Adam Reeves, Aldo, Ad Disha, Chriss V dhe Dj Cool.

Aldo Skënderi i festave të bamirësisë

Ndërsa Aldo njihet prej kohësh si i “festave të bamirësisë”. 10 maj, 2015. Ora 12:00. Përgatitesh për çdo të papritur. Një koncert bamirësie me DJ zhvillohej pranë Rektoratit të Universitet të Tiranës. Vapa ka filluar të ndihet, ndërsa Aldo që ka menduar në detaj çdo gjë, llogarit dhe atë “po sikurin!” Ndoshta dikush ndërron mendje dhe nuk vjen. Por le ta pranojmë që kur nisesh për mirë, ke një shans për të shkuar deri në fund me sukses. Skena është ngritur, njerëzit nga 2, bëhen 6, 17, 20  shumë. Gjithçka është në rregull. Atë 12-orësh do luanin DJ më të mirë, Sardi, Aldo, Ad Disha, Chris V dhe Adam Revees. Emra të njohur, por duhet përpjekje për t’i bindur në këto lloj nismash. Uuups, ikën energjia elektrike. Surprizë. Fonia nuk punon. Pijet nuk mund të jenë shumë të ftohta…. Vrap për të vënë gjërat në vijë. Situata do mbajtur nën kontroll. Për çfarë gjithë kjo përpjekje?

Një festë krejt ndryshe. Paratë e mbledhura do shkojnë për fëmijët me sindromën Down. Aldo thotë se kjo është plotësisht e mundur kur ke vullnetin për ta bërë. “Një herë në vit fitimet nuk shkojnë tek pronari, por dhurohen shumë njerëzishëm tek ata që kanë nevojë.” Ka kontaktuar me fondacionin “Down syndrome Albania” që misioni të kishte dobi. Prej vitesh si P.R është bërë i njohur në rrethet shoqërore. Kjo është një garanci për t’ia dalë në një vend që nuk e ka shumë elastik instiktin e solidaritetit. Në këto raste duhet të kesh intuitë të mirë për të bërë bashkë persona me ndjeshmëri dhe status social që ua lejon xhepi për të dhuruar diçka. Janë çështje profesioni që i kap me kohë. Pritshmëritë ishin deri diku të mira për të qenë pjesë, (sado e vogël) e një pike në oqean për dikë që kërcënohet çdo ditë nga dallgë të larta..

Ka një diferencë mes një feste të zakonshme fundjave dhe asaj që ka një qëllim. Shkujdesjet dhe argëtimi tek e para janë fare të natyrshme, ndryshe tek e dyta. Aty pa e kuptuar ke hyrë në një atmosferë ku muzika luhet për dikë, bisedat janë për dikë dhe në fund kupton që je bërë më i mirë. Aldo më thotë se përzgjedhja e të ftuarve është bërë si me grafik, duke llogaritur që një grup i caktuar personash mund të përgjigjet në një orar dhe disa të tjerë ndoshta pak më vonë. Kështu sheshi nuk do jetë bosh. Përveç shitjes së pijeve, të ardhura ka patur edhe në një kuti simbolike ndihme. Ai thotë se kjo formë feste të plotëson, të jep ndjesi pozitive. Vlerë merr kur i sheh nga afër ata fëmijë që në pafajësinë e tyre të falin buqëzeshje pa interes dhe plot mirënjohje. Për ta bërë sa më të besueshme iniciativën e tij të përvitshme, Aldo në muajt që vijnë do jetë në dyert e familjeve që i ngroh kjo fije shprese. Ai premton që do rendojë punën që të ketë dhe një ekspozitë me punimet e fëmijëve me sindromën Down, për t’i bërë ata të përfillshëm mes nesh.

…kthehemi tek nata e çmendur me muzikë pa fre dhe limit. Kërcim dhe çlirim nga shefi në punë, fatorinot e autobusëve që të kërkojnë 10 herë lekët dhe të dashurat e llastuara që të gjitha duan të jenë “e para”. Aldo ndez moterët e mbrëmjeve “cool” për të lënë sërish takim tek i njëjti vend, në të njëjtën orë…

*Marrë nga revista “ICON”