Portugalia ka rrëmbyer çmimin e parë të festivalit Evropian të këngës, Eurovision 2017, me këngën “Amar Pelos Dois”. Një këngë shumë e qetë dhe një zë i ëmbël i konkurrentit Salvador Sobral, theu traditat e këngëve fituese me performanca të gjalla dhe ritmike.
Në fjalën e tij të fitores, para se të këndonte këngën së bashku me kompozitoren, Salvador tha se: Kjo ishte një fitore e muzikës së vërtetë.
Që prej fillimit, kënga e Portugalisë është vlerësuar nga kritikët dhe është renditur në listën e këngëve favorite për çmimin e parë. “Amar Pelos Dois” ka marrë pikët maksimale të shteteve pjesëmarrëse, me përjashtim të Shqipërisë, e cila ruan traditat e respektimit të fqinjëve.
Shqipëria vlerësoi me pikët maksimale shtetin fqinj Italinë, e cila u përfaqësua nga Francesko Gabbani me këngën “Ocidentali’s Karma”.
