“The Albanian Virgin” titullohet filmi më i ri shqiptar që u prezantua në edicionin e këtij viti të Festivalit prestigjioz të filmit në Varshavë.
Bujar Alimani është regjisori i këtij projekti që sjell si protagoniste aktoren nga Kosova, Rina Krasniqi.
Kjo e fundit ishte e ftuar në emisionin “Nëpër Film” ku dha më shumë detaje rreth këtij filmi në përgjithësi.
“Është vërtetë një punë e madhe që e kemi bërë të gjithë si ekip dhe si produksion. Mezi kemi pritur që ta kemi premierën e filmit e aq më pak ku kjo ndodhi në një festival prestigjioz të kategorisë A, siç është festivali i Varshavës. Është një ndjenjë jashtëzakonisht përmbushëse, shumë e ngrohtë, me dashuri dhe unë ende po ndihem e emocionuar për këtë.
Roli kryesor i Luanës, pra personazhi të cilin unë e luaj në film është një person aq kompleks e i thellë, dhe filmi në esenë trajton shumë çështje dualiste, njësoj sikurse transformimi i Luanës në karakter, në kontekstin e një vajze super femërore nga një fshat rural në Malësi, e cila më pas bëhet burrneshë. Në thelb filmi ngërthen në vete shumë dinamika tjera. Pra, është një histori dashurie e cila nuk mund të manifestohet në mënyrën e duhur, pastaj e kemi hakmarrjen, gjakmarrjen, familjen dhe nderin, që është gjëja kryesore dhe motivi më primarë në Kanun”, tha aktorja.
Po ashtu, Rina tregoi se i gjithë ekipi kanë punuar me shumë pasion për realizimin e këtij projekti.
“Bujari e ka trajtuar gjithë projektin me mish dhe shpirt njësoj edhe producentja e filmit, Anita Elsani, sepse është një projekt në të cilin kanë punuar dhjetë vjet për ta realizuar. Edhe skenaristja e filmit e cila është gjermane, Katja Kittendorf, ka bërë dhjetë vjet për ta shkruar këtë histori. Pra, për ta është një projekt i pasionit, shpirtit dhe zemrës. Prandaj kur ta besojnë një karakter të tillë i cili e ka barrën e përçimit të gjithë storjes dhe mesazhit në thelb, me të gjitha dinamikat që i ngërthen në vete, natyrisht se është një përgjegjësi e madhe”.
Përveç protagonistes Rina Krasniqi, në film luajnë edhe disa aktorë të shquar shqiptarë e nga Kosova, si Astrit Kabashi, Gresa Pallaska, Aurita Agushi, Fatlume Bunjaku, Alban Ukaj, Lum Veseli, Viktor Zhusti, Nik Xhelilaj, Lulzim Zeqja, Igli Zarka, Jonida Vokshi, Gezim Rudi dhe të tjerë.
Rrugëtimi i filmit “Virgjëresha shqiptare” sapo ka filluar, dhe shumë shpejt do të prezantohet edhe për fansat në Kosovë.
“Në momentin kur kthehet filmi në shtëpinë e vet mezi e presim të gjithë. Është një ndjenjë krenarie dhe shumë shpejtë do ta kemi premierën e tij edhe në Kosovë. Fatkeqësisht ende nuk i di datat e sakta se kur do të ndodhë, por ajo është më shumë përgjegjësi e producentëve të cilët vendosin për këtë gjë. Por shumë shpejt do të shfaqet edhe në vendin tonë”.
“Virgjëresha shqiptare”, bashkëprodhim i Gjermanisë, Belgjikës, Kosovës dhe Shqipërisë, fitoi Çmimin Special të Jurisë në kategorinë kryesore dhe Çmimin e Jurisë Ekumenike në Festivalit ndërkombëtarë të filmit në Varshavë.
Festivali që këtë vit shënoi edicionin e 37-të, u mbajt në formatin tradicional nga data 8 deri më 17 tetor.
