Më 4 gusht, një 71-vjeçar me profesion taksist është qëlluar për vdekje me armë zjarri nga një makinë në lëvizje në kryqëzim të rrugës së Rinasit, pranë Fushë Prezës. Viktima u identifikuar si Abudlla Budlla, i cili është gjetur pa shenja jete sipër një fuçie nga banorët e zonës. I moshuari ishte baba i 3 djemve, 2 prej të cilëve jetojnë në Itali, ndërsa tjetri punon taksist në aeroportin e Rinasit.
Për vrasjen e tij janë vënë në pranga dy vëllezërit Saimir dhe Arsil Shera, djemtë e Mejte Sherës, të dashurës së viktimës. Saimir Shera ka qënë i dënuar edhe më parë, ndërsa tani të dy akuzohen për veprat penale: “Vrasje me paramendim” e kryer në bashkëpunim dhe “Armëmbajtja pa leje”.
Lidhja e Mejte Sherës dhe Abdulla Budllës
Mejte Shera që është nënë e nëntë fëmijëve mes tyre edhe e dy vëllezërve ka pranuar tradhtinë me taksistin e vrarë Abdulla Budlla. Gruaja ka dalë në pension si nënë me shumë fëmijë dhe mësohet se ajo i kishte çuar madje mesazh viktimës pasi fillimisht kishte mësuar që viktima kishte pësuar aksident.
“E mora vesh për aksidentin, inshallah ke shpëtuar mirë”, – deklaron t’i ketë shkruar e moshuara, pa e ditur se ndërkohë ai ishte vrarë nga dy djemtë e saj.
Në dëshminë e saj për blutë, ajo ka treguar se i kishte qenë në varrim viktimës dhe se gjatë ceremonisë vriste mendjen se kush mund ta kishte bërë krimin. Nëna e dy djemve të arrestuar pranon se kishte pasur një lidhje intime gjashtë vite më parë me viktimën dhe se këtë histori e dinte vetëm njëri nga të afërmit e viktimës.
“Lidhjen me Dullën e justifikonim si lidhje miqësore dhe shpeshherë e merrja si taksist për të mos rënë në sy, – shton më tej e moshuara, ndërsa tregon se shpesh pinë edhe kafe me viktimën ‘si moshë e thyer që ishim’.
Gruaja tregon sipas burimeve se vajzat i kishin tërhequr vëmendjen por ajo u kishte thënë se “është njeri i mirë nuk i ka bërë keq njeriu”. Gruaja tregon se pas apelit të vajzave, i kishte kërkuar viktimës që të takoheshin sa më larg në lagje dhe se prej një viti apo një viti e gjysmë ajo ishte distancuar disi.
“Bashkëshorti përpara se të lidhesha me Abdullain më dhunonte dhe konsumonte alkool, i kam thënë për hir të fëmijëve do rri me ty në këtë shtëpi, por nuk kam më punë me ty”, shton për babain e fëmijëve e moshuara.
Si shkuan të rinjtë drejt veprimit ekstrem
Shkak i ngjarjes tragjike është bërë fakti se dy të rinjtë nuk e kanë duruar më tradhëtinë që nëna e tyre bënte prej kohësh ndaj të atit. Madje njëri prej tyre kur e kishte mësuar historinë ishte larguar nga banesa për dy vite duke jetuar jashtë vendit. Por çështja që i ka vënë kapak, ka qenë një telefonatë me familjarin tjetër që jeton në Angli dhe që ju kishte thënë “Budlla ka tentuar të ngacmojë edhe motrën”.
Kaq ka mjaftuar që më i rrituri prej tyre, të nxjerrë armën e fshehur, ta fusë në thes dhe të urdhërojë më të voglin për të dalë nga shtëpia, raporton “Gazeta Si”. Dy të rinjtë përdorën një makinë me qira, mjet të cilin e morën në datën 3 gusht duke ia marrë shtetasit Gersian Cela.
Detajet të reja nga dëshmia e nënës së autorëve
Së fundmi detaje të reja janë zbardhur nga dëshmia e Mejte Sherës, e cila gjatë marrjes në pyetje përpara grupit hetimor, ka rrëfyer se tashmë nuk ka më motiv për të jetuar, sidomos pasi mori vesh që djemtë e saj ishin arrestuar për vrasjen e të dashurit të saj, raporton Dosja.al.
“Kur u njoha me Dullën nuk vazhdoja më me burrin. Atij i thashë që më kishte rrahur dhe do e takoja vetëm për shkak të fëmijëve. 4 vite kam takuar Dullën, por vajza në Itali dhe fëmijët e tjerë më thanë që po na turpëron dhe isha shkëputur pak. E takoja Dullën në fshehtësi, e kam mik. Përdorja faktin që ai ishte taksist dhe e takoja. Unë jam bërë për të vrarë veten. Futa djemtë në burg. Fëmijët nuk më flasin më. Shkatërrova familjen. Mendoja kush mund ta ketë vrarë, pasi djemtë më thanë që jo. Ata të familjes së Dullës nuk dinin gjë. Isha në siklet në varrim, për mua ishte shumë e rëndë. Kur mu arrestuan djemtë për mua gjithçka mori fund. Jam bërë për të vrarë veten, s’e di si do jetoj”, – është shprehur ajo.
