Një letër dashurie dedikuar botës! Kështu e ka quajtur Lady Gaga koncertin virtual të titulluar “One World: Together At Home” ku me dhjetra yje të muzikës, kanë performuar live nga shtëpitë e tyre për një audiencë globale.
Eventi i shumëpritur i kuruar nga Gaga, ka mbledhur më shumë se 100 emra të famshëm, duke filluar me legjendarët Rolling Stones, Paul McCartney, Beyonce, Jennifer Lopez, Andrea Bocelli, Billie Eilish, Rita Ora etj. që nga shtëpitë e tyre, kanë kënduar hite të pavdekshme muzikore për plot 8 orë transmetim, në shenjë falenderimi për punonjësit e shëndetësisë në mbarë botën që po përballen me COVID-19.
Gjithashtu, gjatë eventit të organizuar nga lëvizja Global Citizen në bashkëpunim me Organizatën Botërore të Shëndetësisë, përfshiheshin dhe tregime të personave në frontin e luftës me pandeminë, që Paul McCartney i quajti “heronjtë e vërtetë”.
Të ardhurat e grumbulluara nga koncerti mësohet se do të shkojnë në fondin e OBSH të quajtur “Solidarity Respnse Fund”, megjithatë Lady Gaga bëri të qartë se kjo nuk ishte një maratonë për mbledhje fondesh dhe ishte përqëndruar në argëtim dhe mesazhe solidariteti.
Koncerti ishte i ndarë në dy pjesë: E para prej 6-orësh u transmetua në Facebook, Instagram, Twitter dhe YouTube, ndërsa e dyta prej 2-orësh u transmetua në televizionet më të mëdha amerikane.
Moderatorët Stephen Colbert, Jimmy Kimmel dhe Jimmy Fallon drejtuan pjesën e dytë të koncertit, ku Fallon së bashku me grupin The Roots dhe dhjetra punonjës të shëndetësisë, persofrmuan këngën hit të viteve ’80 “The Safety Dance”, me tematikë koronavirusin.
