Shqipëria do të mbahet mend në këtë Europian në arenën ndërkombëtare për tifozerinë e saj. Shqiptarët që u ulën në stadiumin francez u shfaqën me një paraqitje të veçantë, makijazhi në fytyrë dhe veshjet ishin unike, duke tërhequr vëmendjen e të gjithëve.
Së fundi mediat zvicerane shkruajnë se nëse do kishte një titull për tifozërinë më të zjarrtë në Kampionatin Europian, atëherë padyshim që ky do i takonte shqiptarëve.
“Thuajse asnjë tifozeri tjetër nuk feston aq me emocione, zëshëm dhe paqësisht. Kur shqiptarët janë në stadium, zëri i tyre është pushtues.
Pavarësisht se Shqipëria ka pak mundësi për një të tetat e finales, ata e mbështesin edhe në këto momente Kombëtaren e tyre. Pas përfundimit të ndeshjes nga arbitri u festua kudo ku ka shqiptarë në Tiranë, Prishtinë, Zvicër e Gjermani”, shkruan media zvicerane.
Dueli mes Shqipërisë dhe Rumanisë ishte luftë për të mos qëndruar në vendin e fundit të grupit. Megjithatë, falë golit të Armando Sadikut në minutën e ’43-të gjithçka u bë e qartë. “Nëse shqiponjat vijojnë më tej, varet nga ndeshjet e grupeve tjera. Ata shpresojnë që do dalin në katër nga gjashtë ekipet më të mira të vendeve të treta”, thuhet në artikull.
