Këngëtarja angleze këndon shqip në qendër të Prishtinës (VIDEO)

Nuk ka pasur nevojë për truprojë dhe as për vëmendjen e medias! Këngëtarja angleze, Joss Stone, është ndryshe nga artistet e tjera që mund të njihni. 29-vjeçarja ndodhet në Prishtinë për të mbajtur koncertin e saj të parë në këtë vend, në kuadër të turneut të saj në Europë.

Por një mbrëmje para shfaqjes, Stone vendosi që të performojë pa mikrofon krah dy këngëtarëve të tjerë, Shpat Dedës dhe Art Lokajt. Ajo provoi të këndojë këngën “N`shpirt mka rritë”, në një koordinim perfekt me dy muzikantët shqiptarë. Gjithçka ka ndodhur në orët e para të së premtes në qendër të qytetit, përballë Teatrit Kombëtar të Kosovës.

“Çfarë nderi. Mezi po e pres koncertin e sotëm”, shkroi këngëtari Deda në rrjetet sociale, pasi kaloi këtë eksperiencë.

Stone njihet për performancat e fuqishme, ndër të tjera “Son of a Preacher Man” ose “Natural woman”, ndërsa këngët e saj më të njohura janë “You had me” apo “Tell Me ‘Bout It”.