Për herë të parë në historinë e politikës shqiptare, femrat mbizotërojnë shumicën në qeveri. Katër ministra dhanë dje dorëheqjen për t’u zëvendësuar nga katër ministra të rinj, mes tyre edhe dy gra. Ogerta Manastirliu dhe Olta Xhaçka janë dy ministret e reja, që e çuan në 10 numrin e grave në Këshillin e Ministrave të përbërë nga 19 ministra.
Nëse deri dje ishin 11 ministra burra dhe 8 gra, sot për herë të parë kemi një numër më të madh grash në kabinetin qeveritar: 9 burra dhe 10 gra. Olta Xhaçka u vu në vend të Blendi Klosit, në detyrën e Ministres së Mirëqenies Sociale kurse Ogerta Manastirliu, ish-drejtoreshë e QSUT-së, u emërua në vend të Ilir Beqajt si ministre e Shëndetësisë.
Ministret që janë prej kohësh pjesë e kabinetit qeveritar janë: Mimi Kodheli, ministre e Mbrojtjes; Klajda Gjosha, ministre e Integrimit Evropian; Milva Ekonomi, ministre e Ekonomisë; Eglantina Gjermeni, ministre e Zhvillimit Urban; Lindita Nikolla, ministre e Arsimit dhe Sportit; Mirela Kumbaro, ministre e Kulturës; Milena Karito, ministre shteti për Inovacionin dhe Administratën Publike dhe Ermonela Felaj, ministre shteti për Marrëdhëniet me Parlamentin.
Përveç Manastirliut dhe Xhaçkës, u emëruan edhe dy ministra të rinj: Fatmir Xhafaj në krye të Ministrisë së Brendshme në vend të Saimir Tahirit dhe Eduart Shalsi ministër i Çështjeve Vendore në vend të Bledi Çuçit.
