Me rastin e 8 Marsit, Bashkia e Tiranës vendosi këtë të mërkurë që të ofrojë falas biletën e urbanit, për të gjitha femrat.
Kështu çdo femër që do të hipë sot në urbanin e linjave të Tiranës, brenda për brenda kryeqytetit, do të udhëtojë falas, pa paguar biletë.
“Gëzuar 8 Marsin
Transporti publik sot falas për zonjat e Tiranës, një gjest modest mirënjohjeje për ato që mbajnë këtë qytet në këmbë”, shkruan kryebashkiaku Erion Veliaj në Facebook, ku ka publikuar disa foto me zonjat që ka takuar në urban.
Në Shqipëri kjo festë është kthyer në një simbol të veçantë, për nënat dhe vajzat, të cilat në këtë ditë ndihen të privilegjuara. Ato marrin dhurata nga fëmijët apo bashkëshortët, në shenjë mirënjohje dhe respekti.
Kjo ditë shërben jo vetëm për bashkimin e grave pa dallim feje, race, kulture, gjuhe dhe prejardhjeje, por edhe për të kujtuar përpjekjet për barazi, paqe, drejtësi dhe ndërtim në gati 9 dekada.
Dita e Gruas u vendos fillimisht në përkujtim të demonstratës së grave punëtore në Nju Jork. Por përfundimisht, 8 Marsi u vendos si Dita Ndërkombëtare e Gruas, pas tragjedisë së 25 marsit 1911 në një fabrikë po në Nju Jork, ku zjarri i rënë në një fabrikë ku punonin vetëm gra shkaktoi 146 viktima, shumica e tyre emigrante.
Tragjedia shënoi ditën në të cilën gratë përveçse festojnë, edhe protestojnë për të kërkuar më shumë të drejta dhe barazi gjinore në të gjithë botën.
