Reperi kosovar, Ledri Vula dhe biznesmeni që menaxhon disa nga këngëtarët e rinj të Kosovës, Krenar Çoçaj, që sot është i dashuri i moderatores Luana Vjollca, u përballën sot në sallën e gjyqit për një sherr të disa viteve më parë.
Çoçaj bashkë me Gazmend Mirenën akuzohen se natën e 7 qershorit 2012, kanë sulmuar Ledri Vulën, e kanë nxjerrë nga makina në njërën nga rrugët kryesore të Prishtinës dhe e kanë sulmuar.
Nga ky sulm, Ledri Vula ka marrë lëndime trupore. Sipas organit të akuzës, Gazmend Mirena e ka goditur Vulën me tytën e revoles në vetullën e majtë dhe në kokë, ndërsa Krenar Çoçaj me shufër hekuri në shpinë dhe në kokë.
Dy të akuzuarit Mirena dhe Çoçaj, nuk e pranuan fajsinë për asnjërën nga veprat penale për të cilat akuzohen. Ndërsa i dëmtuari Ledri Vula doli para trupit gjykues në cilësinë e dëshmitarit dhe e rrëfeu ngjarjen e natës së 7 qershorit të vitit 2012.
Ai tregoi se atë natë kishte shkuar me Getoar Selimin në studion e “BabaStars” për të dëgjuar incizimin e një kënge të këngëtares Ronela Hajati. Në studio ishin takuar me Fidan Demollin, e më pas që të tre së bashku ishin larguar nga zyra dhe kishin shkuar në drejtim të makinës, e cila ishte e parkuar te kompleksi “Qafa” në Prishtinë.
Sipas Ledri Vulës, në momentin që kanë hyrë në makinë, Getoar Selimi i kishte bllokuar dyert në mënyrë elektronike, ndërsa Gazmend Mirena i kishte bërtitur “Dil jashtë, dil jashtë”, dhe Getoari i hutuar i kishte zhbllokuar dyert”.
“Arsyeja pse kam vendosur të dal nga makina të them të drejtën është sepse Gazmendin e kam njohur dhe nuk ma ka marrë mendja që do të më godasë me të parën”, tha Vula.
Më pas Vula u dëmtua nga Çoçaj me një shufër metalike në dorë, ndërsa Gazmend Mirena e goditi me kondak të revoles, duke bërë që Vula të rrëzohet në tokë.
“Kur më ka goditur Gazmendi, e di që mu ka ba zi dhe instinktivisht i kam qitë duart në kokë”:- tha Vula. Në një moment janë ndalur dhe unë jam ngritur në këmbë dhe kur kam tentuar të ik, më kanë goditur edhe njëherë nga mbrapa. Pasi kam filluar të vrapoj, ata më kanë ndjekur dhe më ka rënë telefoni nga xhepi, jam kthyer të marr telefonin dhe gjaku më rridhte vazhdimisht. Pastaj e kam parë Getoarin duke tentuar që t’i ndalë pasi ata tentonin që të më sulmonin nga mbrapa”:- shtoi Vula.
I pyetur për motivin që kishte pasur Çoçaj që të ushtronte dhunë ndaj tij, Vula përmendi këngëtaren Dafina Zeqiri si motiv xhelozie.
“Motivi i sulmit ishte Dafina, pasi që pas Krenarit kam qenë unë në lidhje me të”, tha Vula.
Në këtë seancë gjyqësore si dëshmitarë okularë, ishin Getoar Selimi dhe Fidan Demolli. Këta të fundit nuk u paraqitën në gjykatë për dhënien e dëshmisë, pasi sipas informatave që trupi gjykues kishte marrë nga stacioni policor, Getoar Selimi jeton në Shqipëri, ndërsa dëshmitari tjetër Fidan Demolli, gjendet jashtë vendit në Gjermani.
Në të vërtetë, një arsye tjetër e mosparaqitjes është fakti që Getoar Selimi ka konflikt interesi pasi i akuzuari për sulm ndaj Ledri Vulës, Krenar Çoçaj, është i dashuri i motrës së partneres së tij, pra i kunatës Luana Vjollca./Express/
