Inteligjenca dhe aftësia për të folur me gjuhën e trupit, përcaktojnë staturën e një modeleje në setin fotografik. Kjo nuk arrihet në një ditë. Përvoja botërore ka kaluar suksese dhe dështime; fazë normale. Për të ecur përpara; hyn në lojë PROFESIONISTI. Agjencitë e modës, nuk janë thjesht një adresë e zakonshme stampuar në kartëvizita. Stafi në këto kategori organizohet si “artileri e rëndë” e zbarkon me strategji të qarta për të krijuar imazhe. Kaq bukur është në botën e modelingut, ti je në qendër. Po kaq e vështirë është të bëhesh pjesë. Arjeta Dhima, regjisore dhe aktore e njohur me rolin e zonjës Suzi në spektaklin e humorit “Portokalli” si dhe në skena të huaja, brenda e jashtë vendit, tashmë drejton studion e Aktrimit dhe të Folurën në Publik, “iACT”. Në eksperiencën e saj si regjisore në spote publicitare, zgjedh të na japë 4 sugjerime që mund t’i marrim si shtylla nga ku nis në mënyrë serioze të firmoset karriera e modeleve.
1. Si duhet të sillet një modele gjatë një spoti kur reklamohet një veshje dhe çfarë duhet të bëjë kur objektiv është një produkt kozmetik?
Fjala “sjellje” është shumë e gjerë në këtë aspekt. Nëse përcaktojmë sjelljen në përgjithësi të një modeleje në një shesh xhirimi, do të thosha se ajo duhet t’u bindet rregullave të terrenit të përzgjedhur dhe të dëgjojë qartë vizionin e regjisorit. Nëse thellohemi pak dhe saktësojmë se si modelja duhet të pozojë apo të interpretojë në rastin e reklamimit të një veshjeje çfarëdo, këtu do të ndalesha pak. Një modele pasarele e cila është mësuar të ecë dhe të mbajë qëndrimin e saj në publik, këtu spektatori i saj i vetëm është lentja e një kamere. Kjo vlen pavarësisht nëse do merren planet e përcaktuara në lidhje me veshjen në mënyrë që ta ekspozojë atë më mirë duke xhiruar detaje. Përgjegjësia e modelit ose modeles është që veshjen ta personalizojë, ta bëjë të vetën, ta dojë dhe të mos shfaqë asnjë pakënaqësi apo nervozizëm “nuk më pëlqen apo nuk më shkon, ah sikur të kisha diçka tjetër… etj”. Çdo mendim apo prapamendim, transmetohet e ndihet gjatë regjistrimeve. Nëse do ekspozonim një produkt kozmetik, përqendrohemi tek tiparet e modelit ose modeles. Po marrim rastin e reklamimit të një rimeli. Fokus kryesor janë qerpikët dhe evident bëhen sytë. Gabimi që bëjnë modelet në të tilla spote, është që syrin e lenë bosh, pa jetë. Me qëllim që syri të duket bukur dhe jo si një manekinë, duhet të mendojë, ta shesë mendimin e saj të brendshëm. Kështu mund të kemi një produkt mbi një qerpik të jashtëzakonshëm dhe një sy plot dritë e gjallëri.
2. Çfarë pune bëhet për të arritur një set me foto të suksesshme në natyrë?
Për hir të së vërtetës, personalisht jam e pasionuar pas fotove, në natyrë apo jo ndonjëherë pak rëndësi ka. Por nëse kemi një fotograf vizionar që arrin të kombinojë bukur modelen me larmishmërinë e horizontit, këtu mund të bëhen mrekulli. Është i vogël numri i fotove të mira të realizuara në natyrë. Në pamje të parë, ambienti i hapur duket sikur të jep më shumë mundësi për të arritur ngjyrat dhe pamjet. Çdo hapësirë që do të zgjidhnim në qiell të hapur, duhet ta përshtatim me veshjen, make up-in, gjendjen etj. Për t’iu rikthyer pyetjes dhe për të qenë të suksesshëm gjithmonë, duhet të kemi parasysh edhe bashkëpunimin e stafit dhe modeles. Mjafton të realizosh konsensusin e fjalëve NATYRË dhe MODELE, e çdo gjë është e mundur.
3. Ku duhet të fokusohet një modele për të përcjellë luks, në varësi të një produkti të caktuar?
Në këtë rast kërkohet njohja e mirë e këtij produkti dhe dëshira për të qenë e përfshirë. Nëse duam që modelen ta kemi imazh të një kompanie x, e para duhet të jetë në stilin e brendit që do marketohet. Kur synimi është reklamimi i një rezidencë, do na duhej një modele për paraqitjen bukur të perceptimit dhe transmetimin e imazhit të një zonje a personi me stil jetese krejt ndryshe. Ekspozimi i detajeve nuk do të kishte rëndësi më shumë sesa shfaqja e luksit dhe shijimi i të gjithë situatës. Transmetimi dhe përcjellja për publikun e ndjesisë së brendshme, është tepër e rëndësishme, nuk përjashtoj faktin e të veshurit apo të trukut, por theksi vendoset gjithmonë tek PËRJETIMI.
4. Deri ku mund të guxojë një modele me sensualitetin?
..deri ku t’ia lejojë ndërgjegjja… Vetë fjala “sensuale” tingëllon shumë femërore dhe joshëse. Për një femër, jo gjithmonë është e rëndësishme të ekspozojë hiret e saj. Do të isha më shumë dakord që një femër më parë të arrijë në pikën e njohjes së vetes dhe të vërë në dukje sharmin e saj. Hijeshia nuk është e thjeshtë për t’u ekspozuar, bën diferencë nga sensualiteti apo e zhveshura.
*Publikuar në revistën ICON, nr.7
Përgatiti: Anilda Kaçaçi
