Nëse ke një celular Samsung Galaxy Note 7 duhet ta fikësh menjëherë tani! Ky është paralajmërimi i kompanisë së “Samsung”-ut për zotëruesit e këtij telefoni, pas raportimeve të reja për shpërthime.
Kompania koreano-jugore gjithashtu deklaroi se do të ndalojë shitjen e këtij modeli. Gjatë shtatorit, “Samsung” tërhoqi nga tregu 2.5 milionë Galaxy Note 7, pas ankesave të përdorueseve se celularët shpërthenin dhe merrnin flakë.
Por pas këtyre lajmeve, kompania njoftoi se ishin zëvendësuar dhe tashmë ishin të sigurta. Por ka raportime të reja se edhe pajisjet zëvendësuese, kanë shpërthyer gjithashtu.
Vetëm pak ditë më parë, pasagjerët e një avioni u evakuuan, sepse një celular i tillë filloi të nxirrte tym. Kompania ka nisur një hetim të mirëfilltë dhe deri në zbardhjen e çështjeve, këta celularë as nuk do të shiten dhe as nuk do të ndërrohen.
Burimi: BBC
