Kanë nisur sot në orën 12:00 aplikimet për Lotarinë Amerikane. Qytetarët do të mund të aplikojnë deri më 8 nëntor, ora 18:00.
Aplikimi mund të bëhet elektronikisht në faqen zyrtare të E-DV.
“Programi DV-2024: Periudha e regjistrimit në internet për Programin DV-2024 fillon të mërkurën, 5 tetor 2022, në orën 12:00 të mesditës, dhe përfundon të martën, më 8 nëntor 2022 në orën 12:00 të mesditës. Dorëzimi i më shumë se një aplikimi për një person do të skualifikojë të gjitha aplikimet për atë person”– thuhet në njoftimin e ndarë.
Udhëzimet e programit DV-2024
Në faqen zyrtare të Lotarisë amerikane janë publikuar edhe rregullat e aplikimit të cilat janë si më poshtë.
Aplikantët mund të kryejnë aplikimin elektronik në faqen zyrtare të E-DV, gjatë periudhës së regjistrimit. Udhëzimet e DV janë gjithashtu në dispozicion në faqen e internetit të Departamentit të Shtetit.
Për të parë nëse janë përzgjedhur, të regjistruarit do të mund të përdorin numrin e tyre unik të konfirmimit të dhënë në regjistrim duke kontrolluar online Kontrollin e Statusit të Regjistruarve në faqen zyrtare të E-DV-së.
Kontrolli i Statusit të të Regjistruarve do të informojë pjesëmarrësit e përzgjedhur se si të aplikojnë për vizën e Lotarisë për veten e tyre dhe anëtarët e familjes së tyre. Të përzgjedhurit do të mund të mësojnë datën e tyre të intervistës për vizë duke hyrë tek Kontrolli i Statusit të të Regjistruarve.
Çdo vit qindra mijëra shqiptarë aplikojnë për lotarinë amerikane. Detajet mbi procedurat e aplikimit si çdo vit janë publikuar nga Departamenti Amerikan i Shtetit dhe sipas rregullave, aplikimi lejohet vetëm një herë për çdo vit për secilin person.
