Çmimi i karburanteve në Shqipëri është rritur në muajt e fundit.
“Euronews Albania” ka vëzhguar situatën në terren për të parë si ka ndikuar kjo rritje në xhepin e konsumatorit.
Por si krahasohet Shqipëria me vendet e tjera?
Me të njëjtën sasi parash provuam të furnizoheshim me karburant në Shqipëri, Kosovë dhe Maqedoni të Veriut.
Me 20 euro në të tre shtetet, por sasia e litrave ndryshoi. Në Shqipëri u blenë 13.9 litra naftë, në Kosovë 17.2 litra, ndërsa në Maqedoninë e Veriut 19.5 litra.
Brenda tregut vendas ka ndryshime në çmime, por sidoqoftë në Maqedoninë e Veriut ishte nafta më e lirë, më pas në Kosovë e në fund në Shqipëri.
Pra, një qytetar në Shqipëri furnizohet me 3.2 litër më pak se në Kosovë dhe 5.6 litër më pak se në Maqedoninë e Veriut.
Në rajon, qytetarët paguajnë rreth 50 lekë taksa direkte vetëm për akcizë dhe TVSH, ndërsa skanimi edhe markimi nuk ekzistojnë.
Ekspertë të hidrokarbureve thanë për “Euronews Albania” se çmimi i naftës do të jetë në këto nivele deri në fillim të vitit 2022, nisur nga kërkesa dhe kuotat e prodhimit nga OPEC në Emiratet Arabe, ndërkohë që zgjidhjen për uljen e çmimit mund ta japë vetëm qeveria duke rishikuar sistemin e taksave direkte.
/euronews.al
