Një pedagoge e Fakultetit Ekonomik në qytetin e Elbasanit ka rezultuar e infektuar me koronavirus dhe është karantinuar në banesën e saj.
Ndërkohë disa pedagogë të tjerë, po në këtë Fakultet, të cilët kanë pasur kontakt me të, mësohet se janë vetëizoluar.
Po kështu në qytetin e Elbasanit kanë rezultuar të infektuar edhe dy mësues të të shkollës 9-vjeçare “Ali Agjah”. Ndërsa një tjetër mësuese e kësaj shkolle është vetëizlouar pasi është në pritje të tamponit të saj.
Covid-19 ka pushtuar thuajse çdo institucion, por rastet e përhapjes së virusit nëpër shkolla janë rritur shumë dhe janë shpërndarë andembanë vendit. Të rrezikuar janë mësuesit dhe nxënësit të cilët po vuajnë pasojat e një viti të pazakontë për shkak të pandemisë.
Vazhdimisht janë raportuar raste të infektuarish në shkolla, edhe pse Ministria e Arsimit deri më tani nuk ka patur asnjë reagim mbi këtë çështje.
Pak ditë më parë, mësuesja e Letërsisë në gjimnazin e “Ismail Qemali”, Irma Marku, denoncoi në “Iconstyle.al”, rastet e infektimeve që u mbajtën të fshehura në këtë shkollë. E shqetësuar, ajo shprehej se po vihet në rrezik jeta e fëmijëve dhe mësueseve, dhe se edhe pse Ministria e Arsimit dhe ajo e Shëndetësisë janë në dijeni dhe deri më tani nuk kanë marrë asnjë masë.
Marku, thotë se teksa ishin të gjithë të angazhuar për të zbatuar protokollet anti-Covid në nisje të vitit shkollor, brenda ekipit të tyre kishte persona të prekur.
“Ky fakt u mësua me vonesë, pasi drejtuesit përgjegjës bënë përpjekjet e tyre, ta mbanin të fshehur. Kjo fshehtësi ka zgjatur disa ditë. Kohë gjatë së cilës kolegë, por edhe nxënës kanë qenë kontakte të personave të prekur”– deklaron ajo.
Mësuesit kanë denoncuar në “Iconstyle.al”, edhe presionet e vazhdueshme që marrin nga udhëheqësit. Një prej tyre thotë se gjatë rasteve të para të raportuara me Covid-19 në këtë shkollë edhe pse bën kërkesë për të qëndruar në shtëpi, u detyruan që të dilnin në punë. Po ashtu, ai thotë se u kërcënuan me vendin e punës, nëse gjatë një takim të bërë pak ditë më parë më kryetarin e Bashkisë, nuk dilnin ta prisnin.
Sakaq, në Shqipëri gjatë 24 orëve të fundit janë konfirmuar edhe 108 raste të reja dhe janë shënuar edhe 2 viktima. Në total numri i viktimave ka shkuar në 375.
/Iconstyle.al
