Ata janë bashkuar për të festuar për ju! Vajzat e grupit më të kërkuar në vitet ’90, “Spice Girls”, konfirmuan ribashkimin e tyre për të festuar albumin e tyre debutues para 20 vitesh.
Tre anëtaret e grupit, Mel B, Emma Bunton dhe Geri Horner, kanë publikuar një video mëngjesin e sotëm duke bërë publik lajmin emocionues për të gjitha fansat e tyre. Por grupi i tyre tashmë vjen me një emër të ri,“GEM”, që lidhet me inicialet e tre këngëtareve Geri, Emma, Mel.
Në videon e publikuar, titulli i së cilës është “GEM”, si emri i ri i grupit të tyre, Mel B ka thënë: “E kemi menduar gjatë, kemi fansat më të mirë në mbarë botën”. Geri shton: ‘Keni qëndruar me ne për 20 vite rresht dhe për këtë duam t’ju falënderojmë shumë”.
Ato më pas kanë treguar se do të organizojnë një festë ku do jenë të ftuar të gjithë. Edhe pse nuk janë zbuluar detaje të mëtejshme, një burim pranë tyre ka deklaruar se Mel B, Emma dhe Geri do të organizojnë një koncert në “Hyde Park” në Londër për të lançuar ribashkimin e tyre, korrikun e ardhshëm.
Ajo që të gjithë dalluam është mungesa e Victoria Beckham dhe Mel C, që mesa duket kanë vendosur përfundimisht që mos t’i bashkohen grupit, por mundësia e tyre në të ardhmen mbetet një mister.
Burimi: Daily Mail
