Është ndarë nga jeta në moshën 89-vjeçare aktorja e njohur shqiptare, Marika Kallamata.
Lajmin e ka bërë të ditur ministrja e Kulturës, Elva Margariti, e cila njofton se homazhet do të mbahen nesër, në ambientet e “arTurbinës”, në orën 11:00-13:00.
“Ndonëse ka luajtur dhjetëra role në teatër e kinema, ajo do të mbetet për ne, përherë, gjyshja e përrallave.
Marika Kallamata, aktorja e mrekullueshme, gruaja me pamje të paqtë e zë të ngrohtë, u nda prej nesh, duke lënë pas jo vetëm një galeri të pasur rolesh, kujtimesh të dashura, për të gjithë ata që e njohën nga afër, por edhe timbrin e ngrohtë: Na ishte seç na ishte…! U prehsh na paqe e dashura jonë, që na e përkunde fëmijërinë me mijëra fantazi! Homazhet do të mbahen nesër, në ambientet e “arTurbinës”, nga ora 11:00-13:00”, shkruan Margariti.
Disa nga rolet më të suksesshme të Marikës janë: Ortensia, Aspasia, Mara, Fallxhesha, Nina, Ana, Nekija etj.
Aktorja doli në pension, në tetor të vitit 1985. Veç roleve në teatër dhe kinema njihet nga spektatorët edhe si “Gjyshja e përrallave”.
Pas viteve ’90 ajo ka luajtur disa role në komeditë: “Shtëpia me dy porta”, “Nesër është vonë” dhe “Një baba tepër”, “Streha e të harruarëve”.
Në krijimtarinë e saj artistike, numëron rreth 100 role.
