Më shumë se një javë pas tërmetit të fuqishëm që shkundi Shqipërinë duke rrafshuar godina në Durrës e disa fshatra përreth me një bilanc prej 52 viktimash, vendi ynë ka parë një valë sensibilizimi popullor të jashtëzakonshëm.
Nga biznesmenët më të fuqishëm tek njerëzit më të thjeshtë janë munduar në çdo formë t’u vijnë në ndihmë të prekurve nga tërmeti që kanë humbur shtëpitë e tyre e në rastin më të keq, edhe familjarët.
Por teksa bujaria e këtyre njerëzve publikë ose anonimë është vlerësuar e përshëndetur, një tjetër formë “bamirësie” ka nisur të shfaqet: ajo e detyruar.
Raportime në “iconstyle.al” vijnë nga punonjës të administratës shtetërore që shprehen se u është komunikuar se një pjesë e pagës së tyre mujore do të mbahet automatikisht nga institucionet ku ata punojnë me qëllim që këto para të shkojnë në ndihmë të të prekurve nga tërmeti.
Mësohet se një urdhër i tillë është komunikuar verbalisht dhe pritet të zbatohet në ditët në vijim, sakaq vetëm pak më parë, deputetja e PD Albana Vokshi ka bërë publik shkresën e drejtorit të Policisë së Shkodrës, që urdhëron punonjsit të dhurojnë një pjesë të pagës për të prekurit nga tërmeti.
“Bamirësi” kjo e denjë për një diktaturë komuniste që jo vetëm trego papërgjegjshmërinë e intitucioneve shtetërore, por edhe flluskën e sapunit që janë fondet e emergjencës së shtetit shqiptar.
