Fati i Alvin Berishës mbetet një mister!
Kanë kaluar 3 javë që nga shfaqja e tij në emisionin “Le iene”, dhe ende nuk dihet se çfarë është duke ndodhur me të miturin shqiptar në Kampin Al-Hol.
Fundjavën e shkuar u raportua se Alvini ishte nën kujdesin e organizatës britanike “Save the Children”.
Por gazetari i “Top Channel”, Muhamed Veliu pati një komunikim me “Save the Children”, e cila mohon të ketë Alvinin nën kujdesin e saj:
Në përgjigjen kthyer për “Top Channel” nëse Alvin Berisha është nën kujdesin e kësaj organizate thuhet:
“Alvin Berisha nuk është nën kujdesin e ‘Save the Children’ në kampin Al Hol. Duke marrë në konsideratë këtë çështje të komplikuar të fëmijëve të juaj në Verilindje të Sirisë, ne do të preferonim për të mos komentuar apo spekuluar se çfarë është duke ndodhur me të dhe se si është ai“.
Pak ditë më parë gazetari i “Le iene”, Taulant Kopliku në një reagim të bërë së fundmi në Facebook tha se, Alvini i vogël ndodhet shëndoshë e mirë, nën kujdesin e organizatës, “Save the Children”.
“Për të hyrë në temë. Sapo u informova nga Ada, vullnetarja e ‘Save The Children’ në kamp. Edhe sot ajo e ka kontaktuar Alvinin i cili është nën kujdesin e kesaj organizate. Në sektorin ku ndodhet i vogli, nuk ka as më të voglin problem nga ata që po shkruhen në media. Kam bindjen se shumë shpejt do kemi lajme të mira. #AlvinNëShtëpi”, shkruante gazetari.
Por tani që “Save The Children” e mohoi këtë lajm, a mund ta dimë çfarë po ndodh me Alvinin?
