Është zbuluar dhe identiteti i bashkëpunëtores së dyshuar të grabitjes së miliona eurove në aeroportin Kombëtar të Rinasit më 9 prill.
Bëhet fjalë për një 31-vjeçare Edlira Bicin, e cila ka qenë efektive e Policisë së Shtetit, por në vitin 2015 është shkëputur nga detyra me dëshirën e saj.
Dyshohet se ajo mund të ketë djegur furgonin e tretë në afërsi të Bathores, me qëllim shpërqendrimin e vëmendjes së policisë. E reja është ende e dyshuar e policisë që po hetohet në gjendje të lirë.
Mësohet se Bici ka pasur një rol shumë të rëndësishëm në grabitjen e 9 prillit, pasi dyshohet se ka larguar paratë nga makina me të cilën u larguan grabitësit në një tjetër vend.
Dyshime të forta lidhen edhe me miqësinë e Admir Murataj dhe për lidhjen intime me njërin prej anëtarëve të bandës së Rinasit.
Deri tani janë 5 të arrestuar për grabitjen e Rinasit dhe të tjerë në kërkim, mes tyre edhe dy shtetas nga Kosova. Të arrestuar janë: Alkond Bengasi; Renaldo Sula; Oltian Veseli; Saimir Çela; Elton Pikli.
Ndërsa Admir Murataj, personi që konsiderohej si truri i grabitjes, mbeti i vrarë në tentativën për t’u arratisur me furgonin e modifikuar “Hetimi Tatimor”.
Klement Çala dhe Eldi Çala janë dy të dyshuarit për grabitjen që janë shpallur në kërkim nga policia. /gazetareforma.com
