Mediat greke shkruajnë sot se i burgosuri Albert Bako, i cili u gjet i vdekur në godinën E të burgut rreth orës 12: 45 të ditës së djeshme, është vrarë nga një shqiptar.
Dyshimet e para mbi autorin e vrasjes, shkojnë tek një tjetër shqiptar i akuzuar për të njëjtin krim si Albert Bako.
Sipas mediave greke ai dhe banda e tij kanë pasur dijeni se Bako po transferohej në burgun e Koridallos dhe janë futur në qelinë e tij ku e kanë goditur në qafë me një thikë artizanale.
Në qelinë e vrasësit u gjetën mbi 300 euro dhe thika artizanale duke hedhur dyshime lidhur me sigurinë në burgje.
Vrasësi i Bakos, identiteti i të cilit ende nuk është bërë i ditur, akuzohet për vrasjen e avokatit Michalis Zafiropulos. Ai bashkë me viktimën do të dilte para trupës gjykuese ku do të përballeshin me akuzën e tentativës së vrasjes së avokatit.
Albert Bako vuante dënimin në një tjetër burg grek, pasi ishte arrestuar për ngjarjen e vitit 2014.
Në nëntor të vitit 2014, në një bar në Mikrolimano të Greqisë, ku argëtoheshin edhe fëmijë, Bako hapi zjarr me kallashnikov ku plagosi 14 persona.
Po ashtu Bako akuzohej se urdhëroi dy shqiptarë që të vrisnin avokatin grek Michael Zafiropoulos.
Bako u arrestua asokohe në Bullgari, pasi ishte shpallur në kërkim nga policia greke.
