Italia po përballet sot me përmbytje dhe erëra të forta, të cilat kanë rrëzuar pemë dhe objekte të tjera duke lënë të vdekur 7 persona.
Vendet më të prekura janë Roma dhe Venecia, ku kjo e fundit ka arritur një nivel rekord të përmbytjeve në 1.5 metër, gjë e cila është shënuar vetëm pesë herë në historinë e qytetit.
Dy persona mbetën të vdekur në provincën e Frosinone-s pas rrëzimit të një peme mbi automjetin ku po udhëtonin, ndërsa një i ri 21-vjeçar humbi jetën në provincën e Caserta-s nga rrëzimi i një peme, ndërsa po ecte në këmbë.
Dy viktima nga era e fortë u identifikuan në Terracina, në bregdetin e Lazio-s.
Ndërsa një grua humbi jetën në qytezën Albisola Superiore, në provincën e Savona-s pasi u godit nga një mjet i fortë në fluturim nga era e fortë.
Viktima e shtatë është identifikuar në provincën e Belluno-s, ndërsa mësohet se gjithashtu është goditur nga një objekt.
Era e fortë e dalja e lumenjve nga shtrati kanë shkaktuar bllokimin e mjaft rrugëve e vështirësi në qarkullimin e automjeteve.
