Një koncert madhështor pritet të jetë ai i grupit legjendar të rrokut “Elita 5” në Tiranë.
Sot në mbrëmje, në Amfiteatrin e Liqenit, grupi do të performojë këngët me te mira duke festuar kështu edhe 30-vjetorin e krijimit të tij.
Pak orë para koncertit, anëtarët e grupit janë pritur nga kryetari i bashkisë Erion Veliaj, i cili i dorëzoi vokalistit Arif Ziberi “Çelësin e Qytetit”.
“Jo se kohët janë më të vështira se ç’kanë qenë, por për të treguar edhe pak bujari, Çelësin e Qytetit mund ta rezervojmë vetëm për miq të veçantë, që vijnë pa trokitur, që vijnë në çdo orë të ditës dhe të natës, që janë si në shtëpinë e tyre. “Elita 5” na ka ndryshuar jo vetëm pikëpamjen për botën, por na ka hapur një dritare në botë, në një moment kur Shqipëria ende nuk e kishte njohur që përtej Adriatikut kishte një botë tjetër”.
Nga ana e tij, vokalisti Ziberi u shpreh shumë i nderuar për këtë vlerësim: “Ky është një çmim shumë i madh, me të vërtetë çmimi më i lartë që grupi “Elita 5”, ka marrë deri më sot dhe prej sot do të ndihemi si qytetarë të Tiranës, pasi kemi çelësin. Shumë faleminderit që na keni kujtuar, që na keni përkrahur dhe që na prisni çdo herë me pozitivitet e optimizëm kur vijmë në Tiranë”.
