Opinioni publik u trondit pas lajmit se një mësues në Tepelenë kishte abuzuar seksualisht me një nxënëse të mitur në ambientet e shkollës.
Në 2 qershor, 63-vjeçari Myzo Dida, i cili ushtron profesionin e mësuesit në fshatin Lyftinjë, u denoncua nga prindërit e nxënëses 11-vjeçare, nën akuzat se ka abuzuar seksualisht me vajzën e tyre.
Të ftuar në emisionin “Me Zemër të Hapur”, ata kundërshtuan masën “detyrim paraqitje” të caktuar nga Gjykata dhe kërkojnë që ai të dënohet me burg.
Prindërit treguan se vajza e tyre ndodhej në gjëndje të rënduar psikologjike, madje kishte tentuar disa herë vetëvrasjen.
”Kur vajza mësoi se ai është liruar u bë keq dhe ka tentuar edhe vetëvrasjen. Nuk kemi besim tek drejtësia. Ata gjyqin e bënë vetë në mungesë.”- tregoi i ati i vajzës Besnik Muçodemi.
Prindërit rrëfyen se ata zbuluan se vajza e tyre abuzohej përmes një telefonate anonime.
“Në darkë më thotë vajza e madhe mbaro punë dhe hajde se dua të flasim. Ne kemi marrë një telefonatë anonime ku thoshin: ‘I thoni atyre prindërve se vajza e tyre është abuzuar në shkollë’. Shkova fola me vajzën dhe ajo filloi të qajë, tha se nuk na kishte treguar se kishte frikë se do më rrihte babi. Unë nuk kam kuptuar asgjë, por vajza më thoshte më dhemb koka nuk shkoj dot në shkollë. Nuk më thoshte se çfarë ndodhte në shkollë. Vajza nuk është shprehur. Unë ndoqa rrugën ligjore se mendova se ka shtet. Me mësuesin nuk kemi folur për këtë çështje, por ne e njihnim personalisht atë më përpara. Mësuesi na thoshte që vajza është pak dobët. Kemi mësuar se ai i thoshte vajzës se do të mbys po i the babait, do të pres kokën me thikë.” – përfundoi i ati i vajzës, i cili kërkon nga drejtësi për të bijën.
