Mëngjesin e ditës së djeshme ndodhi një ngjarje tronditëse në mes të tregut të qytetit të Milotit. 35-vjeçarja Violeta Donaj qëlloi me katër plumba bashkëshortin e saj 42-vjeçar, Kujtim Donaj. Në dëshminë e dhënë në polici ajo tha se e vrau bashkëshortin për motive xhelozie pasi ai e tradhtonte.
Një ditë pas ngjarjes tronditëse familjarët e Violetës kanë dëshmuar në polici dhe kanë thënë se ata nuk ishin në dijeni që ajo mbante armë dhe që kishte në plan të kryente këtë akt të rëndë.
“Nuk e dinim që Violeta kishte armë, por e kemi ditur se kishin probleme dhe Violeta kishte shenja në trup. Violeta e kishte vendosur të ndahej nga bashkëshorti i saj dhe ishte nisur për tek shtëpia e saj në Rrëshen. Violeta ishte nisur për të marrë vajzën dhe rrobat. Ajo kishte marrë kunatën që ta ndihmonte t’i mbante”, kanë thënë familjarët e Violetës në polici.
Madje vëllai i saj thotë se nuk e ka idenë se ku mund ta ketë gjetur Violeta armën e krimit. Ai insiston në faktin që motra e tij kishte shenja dhune në trup dhe konflikte të vazhdueshme më bashkëshortin e saj.
“Ne s’kemi pas dijeni në lidhje me ngjarjen, di që kanë pas konflikte të vazhdueshme dhe për këtë motra iku nga shtëpia. Motra më ka treguar edhe shenjat e dhunës në trup. Por nuk dija asnjë gjë për veprimet që do të kryente. Dje në mëngjes na tha që do shkonte në shtëpi të merrte rrobat. Shkoi bashkë me bashkëshorten time”, mësohet të ketë thënë vëllai i Violetës.
Burimi: Balkanweb
