Ndoshta nuk do ta kishit menduar, por puçrrat janë në modë! Zgjohemi në mëngjes dhe gjëja e parë që bëjmë është të kontrollojmë fytyrën. Gjithçka duket e zymtë nëse në faqen ose ballin tonë sapo ka nisur të dalë një akne, që i duhet disa ditë që të zhduket.
Mund të jetë arsyeja jonë për të mos dalë apo për të mos pranuar takime të rëndësishme. Por ndoshta ka ardhur koha t’i themi mjaft kësaj!
Njerëzit që iu rrethonjë ju pranojnë ashtu siç janë dhe të kesh akne është gjëja më njerëzore në botë.
Këngëtari Justin Bieber sapo e zyrtarizoi! Pak ditë më parë të gjitha mediat e huaja shkruanin për fytyrën e tij me akne, dje ai publikoi një video ku tregonte nga afër se si i dukej me mbishkrimin: “Puçrrat janë “in”.
Ky mesazh motivues vjen vetëm pak kohë pasi supermodelja u shpreh për puçrrat gjatë daljes në “Golden Globes” kështu: “Mos i lë kurrë këto gjëra që të ndalin”.
Pavarësisht trajtimeve dhe kujdesit për fytyrën, shpesh aknet janë të pashmangshme dhe këtë na e vërtetojnë të famshmit. Edhe pse kanë deramtologët dhe kremrat më të shtrenjtë, hormonet do të bëjnë të tyren dhe nuk ka asgjë për të fshehur.
Me akne është edhe moda
Një foto e Anxhelina Hadërgjonaj në dhjetor të 2016-s nxiti titujt negativë të mediave online, si: “Anxhelina ju tmerron pagrim”.
Një ditë më pas në 21 dhjetor të 2016-s, ajo kishte një mesazh për të gjithë:
“Si fillim do kisha shumë dëshirë të dija kush është “zotëria” ose “zonja” që e ka qëndisur artikullin. Së dyti përgëzoj mediat e tjera që e kanë marrë lajmin gati dhe kanë ndryshuar titullin duke paralajmëruar lexuesit për pamjet makabër, Bravo, na kënaqët! Nuk jam prononcuar asnjëherë për idiotlliqet që shkruhen përditë në lidhje me mua sepse nuk më ndikojnë as për mirë dhe as për keq. Por kur shkruhet “kujdes se do fiksoheni” është shqetësuese, jo sepse më intereson opinioni i injorantit ose injorantes që ka shkruar artikullin, por kjo çështje kalon ne bullying.
Ka shumë të rinj dhe të reja që kanë probleme me akne dhe ndonjëherë mund të jetë shkaku i pasigurisë më të madhe që kanë në vetvete. Pastaj kemi tipat si gazetari në fjalë që i bëjnë të ndihen më të pasigurt në vete me shprehjet që përdor kur i referohet dikujt me lëkurë problematike, dhe rasti konkret jam unë. KUJDES duhet të kemi nga injorantët si puna juaj, kushdo qofsh gazetar i nderuar, se puçrrat unë sot i kam, nesër s’i kam, po vaj medet mendjes s’ke ç’i bën. Dhe diçka te fundit! Nuk është trembur ndonjëri deri më sot, edhe më beso dal përditë pa makeup”.
Dua Lipa gjithashtu pozoi për aparatin e një të afërmi vitin e kaluar, ku nuk kishte vendosur fare makijazh.
Mediat shqiptare nisën të shkruanin se sa “zhgënjyese” ishte pamja e saj, duke harruar talentin e këngëtares shqiptare dhe bukurinë e saj.
Në tetor të 2017-s, Floriani postoi vet në “Instagram” një foto me pasojat e hormoneve të adoleshencës: puçrra në të gjithë fytyrën.
Si reaguan ndjekësit e tij? Komentet ishin negative ose ofenduese, për ta këngëtari nuk duhet ta kishte publikuar një foto të tillë.
Nga ana tjetër, pse fansat kritikojnë personazhet e njohur kur mbulojnë puçrrat me makijazh ose “photoshop”?
Rasti konkret është ai i Adelina Tahiri! Këngëtarja nga Maqedonia ka pasur gjithnjë një fytyrë delikate dhe në foton kur iu postua pa të drejtën e saj, ajo tha: “Nuk jam unë në këtë foto, është fotomontazh”.
Në këtë rast, ndjekësit nisën që të shkruanin se pse duhet të gënjente.
Atëherë ne kemi një pyetje për secilin prej jush:
Duhet apo jo t’i mbulojnë puçrrat të famshmit? A duhet t’i mbuloni dhe ju puçrrat?
Puçrrat në pasarelë
Në qershor të 2016-s, gjatë Javës së Modës për Meshkujt në Milano, dizajnuesit Moto Guo vendosi që modelët e tij të sfilonin me këtë pamje:
Ju duket e shpifur? Nuk ndiheni komod kur e shikoni?
Modelët u paraqitën me një pamje me puçrra dhe shumë rinore, një kthim në adoleshencë. Nuk u tha nëse aknet ishin natyrale ose të ekzagjeruara me makijazh, por shfaqja u cilësua si shumë e çuditshme. Po nëse në atë shfaqje të sfilonte Justin Bieber?
Këshilla: Dashurohuni me puçrrat tuaja, sepse janë shumë në modë!
Pse nuk duhet ta vrasim mendjen nëse kemi puçrra?
Një studim i ri ka zbuluar se ata që kanë akne në fytyrë mund të jetojnë më gjatë dhe të plaken shumë më ngadalë, në sajë të disa pjesëve të rëndësishme të ADN-së së tyre.
Është vënë re se ata që vuajnë nga aknet në fytyrë shpesh përjetojnë shenja të plakjes në fytyrë, shumë më vonë se miqtë e tyre dhe tashmë shkencëtarët kanë zbuluar se pse.
Në çdo fillesë të ADN-së ka disa kapele mbrojtëse të quajtura telomeres, që mbrojnë kromozomet që strehojnë ADN-në tonë. Shkencëtarët kanë zbuluar se këto shfaqen më gjatë tek ata që vuajnë nga aknet. Arsyeja që kjo është kaq e rëndësishme është se përkeqësimi i telomereve është i lidhur me plakjen. Kështu që personat që kanë një jetëgjatësi më të madhe të këtyre mbrojtësve, plaken më ngadalë.
Udhëheqësi i studimit Dr. Simone Ribero nga King College në Londër, tha se studimi ka të bëjë me jetëgjatësinë e telomere-ve, të cilat janë me shumicë në personat që kanë akne, që do të thotë se “qelizat e tyre mund të mbrohen nga plakja”.
