Stomatologia e njohur, Olesia Duka, ish-bashkëshortja e kantautorit Bojken Lako, është vënë në prangat e policisë, pasi akuzohet për mashtrim me vlera të mëdha financiare, që arrijnë deri në vlerën 900 mijë euro. Gjatë kontrollit në shtëpi, Olesia Dukës i janë gjetur dhe sekuestruar 1.5 gr kanabis, deklarata huamarrje dhe libra llogarish.
Prokuroria e Durrësit ka zbuluar skemën e mashtrimit të stomatologes 38-vjeçare, e cila iu merrte para qytetarëve të ndryshëm, duke i gënjyer se kishte 8 klinika dentare dhe duhet të blinte aparatura e pajisje, ndërkohë që nuk i kthente më shumat e marra. Një prej ‘viktimave’, që kishte rënë pre e mashtrimit dhe që e kishte pësuar më shumë, ishte biznesmeni I. H., i cili ka bërë dhe denoncimin.
Gjykata vendosi sekuestro preventive për pesë pasuri të 38-vjeçares, 4 apartamente në Tiranë dhe 1 në Durrës.
Olesia nuk është një emër i padëgjuar për publikun shqiptar. Ajo ka qenë shpesh e pranishme edhe në media, sidomos pas divorcit me kantautorin e njohur Bojken Lako, lidhja me të cilin zgjati rreth 5 vjet.
Gjykata e Rrethit Gjyqësor Durrës ka caktuar masën e sigurimit arrest me burg për shtetasen Olesian, për shkak se ajo vazhdon të kryejë veprime në mbulimin dhe dredhinë për mashtrim dhe vjedhjes se shumave të mëdha parash edhe tek disa persona të tjerë.
DOSJA E PROKURORISË
“Prokuroria pranë Gjykatës së Shkallës së Parë Durrës, në bashkëpunim me Sektorin e Krimit Ekonomik në Drejtorinë e Përgjithshme të Policisë, mundësoi zbulimin e një vepre penale të një shtetasja për mashtrim me vlera të mëdha financiare, deri në 900 mijë euro. Prokuroria pranë Gjykatës së Shkallës së Parë Durrës, në 26 janar 2018, ka filluar procedimin penal nr. 143/2018, për veprën penale “Mashtrimi”, të parashikuar nga neni 143/3 i K. Penal në ngarkim të shtetases O.D. banuese në Tiranë, në dëm të shtetasit paditës I.H.
