Ata që e njohin si Aleksia Peleshi, e dinë që ajo është vajza e zëvendëskryeministrit, Niko Peleshi. Ndërsa për të tjerët që dinë vetëm kaq, ne ju themi se Aleksia është një vajzë ambicioze me shumë qëllime, dëshira në jetë dhe shumë shpresa se do t’i arrijë t’i përmbushë.
Ajo ishte vetëm 14 vjeçe kur fillimisht e pamë në kopertinën e një reviste italiane. Tiparet e bukura zeshkane, karakteristike shqiptare dhe veshja popullore, bënë bujë në të gjitha mediat. Imazhi i një vajze të kuruar u përfol shumë dhe shkoi deri në komente për ndërhyrje estetike, për të cilat Aleksia shprehet se nuk është kundër, por nuk i pëlqejnë, aq më tepër te vetja.
Sot Aleksia po ndjek pasionin e saj për modeling dhe për këtë thotë se ka mbështetjen e prindërve, edhe pse ata e dinë që kjo është “një gjë e momentit”. Në një intervistë ekskluzive për portalin “ICONstyle”, Aleksia rrëfen se e ka menduar veten edhe në politikë. “Gjithmonë kam dashur të drejtoj një vend, të punoj për mirëqenien e tij, të bëj ndryshime dhe sigurisht siç e kërkon politika, të debatoj”, shprehet ajo për “ICONstyle” edhe pse më vonë duket skeptike nëse kjo do të jetë rruga që do të ndjekë në të ardhmen.
Sot për sot, në moshën 15-vjeçare rruga më e afërt, që synon Aleksia është që të lidhë një kontratë me një agjenci në Korenë e Jugut, një vend që i pëlqen shumë, por që sërish mbetet një dëshirë e madhe. Për më tepër mund të lexoni intervistën e mëposhtme:
Tashmë ke krijuar identitetin tënd si një personazh i njohur publik dhe nuk njihesh vetëm si vajza e zv. kryeministrit. Kush është Aleksia Peleshi, si ju prezantohesh njerëzve?
Nuk mendoj se ishte e nevojshme të njihesha publikisht për të krijuar identitetin tim. Identitetin tim e kam pasur gjithmonë, pavarësisht sesi më njihnin të tjerët. Hëm… Aleksia Peleshi është një 15-vjeçare ambicioze me shumë qëllime në jetë, por shpesh herë e pasigurt në vetvete. Kështu do ta konsideroja veten.
Pasioni jot për modelingun arriti suksesin më të madh, kur u shfaqe në revistën italiane “Dimmi”. Si u përzgjodhe për kopertinën dhe si u ndjeve për këtë eksperiencë?
Ndodhi papritur. Agjentja e agjencisë sonë, Greissi më mori në telefon dhe më tha se isha përzgjedhur për të pozuar për kopertinën e një reviste italiane. Normalisht u ndjeva e lumtur për këtë arritje dhe mendoj se janë meritat e Greissit dhe stafit të “Grace Models”, sepse falë punës së tyre të palodhur ne kemi ecur shumë.
A e pate mbështetjen e prindërve kur vendose të merrje rrugën e modelingut?
Faktikisht nuk është modelingu rruga që kam zgjedhur për të ardhmen. Modelingu për mua është vetëm një pasion i momentit dhe prindërit e mi e dinë këtë. Sidoqoftë, prindërit e mi kanë qenë gjithmonë aty për të më dhënë kurajo.
Cila modele shqiptare të frymëzon? Ke ndonjë idhull? Po nga të huajat?
Jo nuk kam idhuj. Unë jam Aleksia dhe kam vendosur të arrij aty ku dua si Aleksia, me mënyrat e mia jo duke u frymëzuar nga hapat e dikujt tjetër. Por sigurisht që ka shumë modele që më pëlqejnë. Nga të huajat do të piketoja Adriana Limën, Alena Shishkovën, Cara Delevingne, Rosie Huntington-Whiteley, Miranda Kerr etj, pasi më duken femra me shumë ambicie dhe energji. Përsa u përket modeleve shqiptare, nuk jam e sigurt se kë do të veçoja.
E ke menduar veten ndonjëherë në politikë?
Po, disa herë. Gjithmonë kam dashur të drejtoj një vend, të punoj për mirëqenien e tij, të bëj ndryshime dhe sigurisht siç e kërkon politika, të debatoj. Por nuk e besoj se politika është rruga që do të ndjek në të ardhmen.
Cili është projekti i radhës? Ku do ta shohim së shpejti Aleksian?
Të them të drejtën nuk jam duke u marrë me ndonjë projekt për momentin, por synoj të lidh një kontratë të shkurtër në verë me një agjenci në Korenë e Jugut, pasi më pëlqen shumë si vend. Nuk e di se sa e mundur është kjo dhe sesa dakord do të jenë prindërit e mi, prandaj për momentin mbetet thjesht një dëshirë e madhe.
Të shohim mjaft të kuruar në fotot që realizon në rrjetet sociale? Si është Aleksia në jetën e përditshme?
Shumë më e thjeshtë, për sa i përket makijazhit. Për sa i përket veshjes, shumicën e kohës jam e veshur me të zeza, gjë që shumë njerëzve u duket e çuditshme.
Cila është fotoja e fundit që ke realizuar me telefonin tënd?! Qoftë edhe një selfie…
Është një foto e një kishe ortodokse në Durrës në fakt.
Pa cilin produkt bukurie ose veshje nuk bën dot Aleksia?
Lipliners. (Lapsat e buzëve). Janë produkti im i preferuar dhe më pëlqen të eksperimentoj me ngjyra të ndryshme. Veshjet e zeza janë gjithashtu shumë të nevojshme për mua. Nuk e mbaj mend herën e fundit që kam veshur ngjyra të ndezura.
Nga fotot e publikuara kemi vënë re se të pëlqejnë tatuazhet? A ke një të tillë dhe nëse jo çfarë tatuazhi do të preferoje të bëje dhe ku?
Po më pëlqejnë dhe po e kam një të tillë. Kam një tatuazh te kyçi i cili i dedikohet babit. Është një shenjë kelte që simbolizon lidhjen midis babait dhe bijës.
Cila është “çmenduria” më e madhe që ke bërë dhe që i ke çuditur miqtë e tu?
Nuk më kujtohet të them të drejtën, kam bërë shumë gjëra të tilla.
Çfarë përgjigje ke për ata persona që mendojnë se ke kryer ndërhyrje plastike?
Më duket shumë i pavend fakti që akuzohem për ndërhyrje plastike. Unë jam 15 vjeçe dhe të mendosh që këto akuza i kam dëgjuar që kur isha 14. Nuk e besoj se ka ndonjë vend apo doktor në botë që merr përsipër t’i bëjë ndërhyrje plastike një 14-vjeçareje. Nuk e kuptoj përse në ditët e sotme çdo gjëje i vihet epitet “fallco”, por sidoqoftë nuk u kushtoj shumë rëndësi këtyre komenteve.
I përkrah personat publikë që vendosin të kryejnë operacione për të ndryshuar imazhin?
Nëse dikush ndihet i pasigurt me veten e vet dhe operacionet plastike do e ndihmonin të kishte më shumë besim te vetja, nuk shoh asgjë të keqe të vendimi i tyre. Gjithsecili është i lirë ta “trajtojë” veten si të dojë. Personalisht nuk më pëlqejnë operacionet e tepruara që të bëjnë të ngjash joreale, por nuk kam asgjë kundër zgjidhjes së të kryerit kirurgji plastike. Gjithashtu do të shtoja se nevoja për të ndryshuar imazhin ka lindur nga standardet absurde të bukurisë që ne kemi krijuar në një mënyrë apo një tjetër. Para se të gjykoja personat që vendosin të ndryshojnë imazhin e tyre nëpërmjet operacioneve plastike, do të gjykoja ata që i kanë shtyrë të mendojnë se diçka nuk shkon me pamjen e tyre.
Burimi: ICONstyle.al
