Dy vite pa e përqafuar, pa ia dëgjuar zërin dhe pa ditur çfarë ndodhte në jetën e saj. Për reperin Fero, largësia nga e bija ka qenë një nga periudhat më të dhimbshme të jetës, ndërsa ritakimi me të, pas kaq shumë kohësh, një moment që nuk do ta harrojë kurrë.
I ftuar mbrëmjen e së premtes në emisionin “Live me Luizin”, artisti hapi zemrën dhe rrëfeu për herë të parë me kaq shumë emocione frikën që e kishte shoqëruar gjatë ndarjes nga vajza: mos ndoshta ajo e kishte harruar.
Lexo edhe :
“Për dy vite nuk e kam takuar dhe as nuk kam folur në telefon. Ka qenë periudha më e vështirë për mua”, tregoi Fero, duke kujtuar dhimbjen e mungesës së saj dhe përpjekjet për të rifituar kontaktin.
Ai pranoi se gjatë asaj periudhe kishte kërkuar ndihmë përmes gjykatës dhe rrjeteve sociale, ndërsa sot e sheh me keqardhje mënyrën se si kishte reaguar në disa momente.
“Njeriu, kur është i lënduar emocionalisht, mund të gabojë më së shumti, dhe kam gabuar”, u shpreh reperi.
Por pjesa më prekëse e rrëfimit erdhi kur kujtoi udhëtimin drejt Dubait, ku pas dy vitesh do të shihte sërish të bijën.
Vajza ishte rritur, koha kishte kaluar dhe diçka kishte ndryshuar: ajo nuk fliste më shqip.
“Kur e kam takuar për herë të parë, kam shkuar në Dubai. Kisha dy vite pa e parë dhe pa folur me të. Kur flas me të, kishte harruar shqipen fare dhe fliste vetëm anglisht”, tregoi ai.
Një detaj që e kishte prekur veçanërisht, pasi gjatë kohës që kishin qenë larg, vajza kishte humbur edhe komunikimin në gjuhën amtare.
Megjithatë, mbi të gjitha, Fero kishte vetëm një frikë: nëse e bija do ta njihte ende.
“E kam puthur në ballë… Nuk më kishte harruar. E kisha frikë se mos më kishte harruar”, rrëfeu ai, duke përmbledhur në pak fjalë gjithë ankthin e dy viteve larg saj.
Sot, marrëdhënia me ish-bashkëshorten, modelen Arbenita Ismajli, duket se ka hyrë në një kapitull më të qetë. Fero tregoi se të dy kanë lënë pas konfliktet dhe po përpiqen të ruajnë një komunikim të shëndetshëm për hir të vajzës.
“Unë me nënën e vajzës sime gëzojmë një raport shumë të mirë. Duam që ta ruajmë këtë raport për hir të vajzës, e cila është duke u rritur”, tha ai.
Reperi shprehu gjithashtu mirënjohje ndaj Arbenitës për bashkëpunimin e tanishëm si prindër, duke theksuar se dëshiron mbi gjithçka të mos e humbasë më kontaktin me të bijën.
Përtej ndarjes dhe vështirësive personale, Fero pranoi se atësia e ka ndryshuar thellësisht.
“Vajza më ka mësuar se unë çdoherë duhet të bëj përpjekje për të ndryshuar veten për të mirën time dhe të jem një shembull më i mirë për të”, u shpreh ai.
Pas dy vitesh mungesë, për reperin momenti më i rëndësishëm nuk ishte thjesht rikthimi pranë vajzës, por të kuptuarit se, pavarësisht kohës dhe largësisë, ajo nuk e kishte harruar babanë e saj.
