Misteri më i madh i Hollywood-it ka marrë fund! Robert Pattinson është zyrtarisht James Bond i ri, duke marrë një nga rolet më të lakmuara në historinë e kinemasë.
Pas muajsh spekulimesh dhe një procesi të gjatë përzgjedhjeje, Amazon MGM Studios konfirmoi këtë të hënë, më 16 nëntor, se aktori britanik 40-vjeçar do të jetë pasardhësi i Daniel Craig në rolin e agjentit legjendar 007.
Pattinson, i cili fitoi famë botërore si Edward Cullen në sagën “Twilight” dhe më pas interpretoi Bruce Wayne në “The Batman”, do të nisë një kapitull krejtësisht të ri në karrierën e tij.
Filmi i ardhshëm, i njohur për momentin si “Bond 26”, do të drejtohet nga Denis Villeneuve, regjisori i “Dune” dhe “Blade Runner 2049”, ndërsa skenari i është besuar Steven Knight, krijuesit të serialit të famshëm “Peaky Blinders”.
Në një deklaratë pas konfirmimit, Pattinson e cilësoi marrjen e rolit të James Bond si një nder të jashtëzakonshëm dhe realizimin e një ëndrre, duke shprehur entuziazmin për bashkëpunimin me ekipin e ri.
Për rolin e agjentit 007 ishin përfolur prej kohësh disa emra të njohur, mes tyre Aaron Taylor-Johnson, Henry Cavill, Callum Turner dhe Josh O’Connor. Megjithatë, pas audicioneve dhe provave para kamerës, zgjedhja përfundimtare ishte Pattinson.
Aktori bëhet kështu James Bond i shtatë i serisë zyrtare, duke ndjekur gjurmët e Sean Connery, George Lazenby, Roger Moore, Timothy Dalton, Pierce Brosnan dhe Daniel Craig.
Craig e interpretoi personazhin në pesë filma, duke e mbyllur rrugëtimin e tij në vitin 2021 me “No Time to Die”.
Projekti i ri shënon gjithashtu një ndryshim historik për sagën, pasi do të jetë filmi i parë i James Bond nën kontrollin krijues të Amazon MGM Studios, pas marrëveshjes së vitit 2025 me producentët e mëparshëm.
Për produksionin do të kujdesen Amy Pascal dhe David Heyman, ndërsa titulli përfundimtar dhe data e premierës nuk janë bërë ende të ditura.
Nga vampiri romantik te superheroi i errët dhe tani te spiuni më i famshëm në botë, Robert Pattinson po përgatitet për një nga transformimet më të rëndësishme të karrierës së tij.
Tashmë mbetet për t’u parë se çfarë James Bond-i do të sjellë në ekran dhe si do ta presë publiku këtë zgjedhje.
