Bukuroshja shqiptare, Almeda Abazi do të festojë shumë shpejt ditëlindjen e saj të 25-të. Por gëzimi për të do të jetë i dyfishtë pasi, pikërisht në ditën e lindjes, ajo do të lidhë kurorë me të fejuarin e saj, aktorin turk Tolgahan Sayışman.
Sipas “Habertürk”, modelja dhe aktorja shqiptare do të lidhë kurorë me Sayışman-in më 13 shkurt, dita kur do të festojë 25-vjetorin. Sipas mediave turke, çifti ka përveshur mëngët për përgatitjet e e dasmës, por edhe për rregullimin e shtëpisë së tyre, pasi mësohet se Almeda dhe Tolgahan do të jetojnë së bashku në Levent të Stambollit.
Dyshja e famshme u fejua në nëntor të vitit 2016, kur ylli i serialeve turke shkoi në shtëpinë e ish-miss-it shqiptar për t’i kërkuar dorën, duke respektuar edhe traditat shqiptare.
