Biznesmeni turk Aydin Çavusoglu, vëllai i ish-ministrit të Jashtëm të Turqisë, Mevlüt Çavuşoğlu, ndodhet në gjendje kritike për jetën pas një incidenti të rëndë me armë zjarri që ka ndodhur në Antalia.
Ngjarja e rëndë është regjistruar ditën e martë në një stacion karburanti në pronësi të tij, ku sipas dëshmive të para të punonjësve, janë dëgjuar të shtëna armësh brenda zyrës së biznesit. Momente paniku janë krijuar në ambientet përreth, ndërsa personat e pranishëm kanë njoftuar menjëherë autoritetet.
Forcat e policisë dhe ekipet e emergjencës kanë mbërritur me shpejtësi në vendngjarje, duke e gjetur biznesmenin të plagosur rëndë. Ai është transportuar urgjentisht në spital, ku iu nënshtrua një ndërhyrjeje kirurgjikale. Aktualisht, burime spitalore bëjnë me dije se gjendja e tij mbetet shumë e rëndë dhe nën monitorim të vazhdueshëm nga mjekët.
Ndërkohë, policia turke ka nisur një operacion të gjerë hetimor, duke rrethuar zonën dhe duke sekuestruar prova materiale nga vendi i ngjarjes. Hetuesit po punojnë për të rindërtuar dinamikën e plotë të incidentit, ndërsa deri në këto momente nuk është konfirmuar ende nëse kemi të bëjmë me një sulm të qëllimshëm apo me një incident aksidental.
Burime pranë hetimit bëjnë të ditur se po shqyrtohen disa pista, përfshirë konfliktet e mundshme të biznesit apo rrethana të tjera personale. Analizat balistike pritet të luajnë një rol kyç në zbardhjen e plotë të ngjarjes.
Aydin Çavusoglu njihet si një biznesmen i rëndësishëm në zonat e Antalias dhe Alanyas, me aktivitete të shumta ekonomike. Familja e tij ka gjithashtu lidhje të forta me sportin, pasi një tjetër anëtar është i përfshirë në drejtimin e klubit të njohur Alanyaspor.
Në momentin e incidentit, Mevlüt Çavuşoğlu ndodhej jashtë Turqisë, por sipas mediave turke, ai pritet të kthehet menjëherë në vend për të qenë pranë familjes në këtë situatë kritike.
