Qytetarët e Shqipërisë dhe Kosovës do të mund të lëvizin sërish pa kontrolle kufitare, pas rikthimit në fuqi të marrëveshjes mes dy qeverive që hyn në zbatim nga kjo e premte.
Masa synon të lehtësojë ndjeshëm qarkullimin mes dy vendeve, veçanërisht gjatë sezonit turistik, duke shmangur procedurat e zakonshme të kontrollit të dokumenteve në pikat kufitare. Qytetarët do të kalojnë kufirin pa pasur nevojë për verifikime të detajuara të pasaportës apo kartës së identitetit, duke e bërë lëvizjen më të shpejtë dhe më të thjeshtë.
Marrëveshja nuk zbatohet gjatë gjithë vitit, por në periudha të caktuara: nga 1 maji deri më 30 shtator, si dhe nga 1 nëntori deri në fund të shkurtit. Në total, kjo përkthehet në rreth 9 muaj lëvizje të lirë gjatë vitit.
Autoritetet e të dy vendeve e shohin këtë nismë si një hap të rëndësishëm jo vetëm për turizmin, por edhe për forcimin e marrëdhënieve ekonomike, tregtare dhe sociale mes Shqipërisë dhe Kosovës.
Sipas të dhënave të Institutit të Statistikave, vetëm gjatë periudhës maj–shtator të vitit të kaluar janë regjistruar mbi 3 milionë hyrje nga Kosova drejt Shqipërisë, duke e konfirmuar atë si një nga burimet kryesore të turistëve për vendin.
Rikthimi i kësaj mase pritet të sjellë edhe më shumë lëvizje, bashkëpunim dhe integrim mes qytetarëve të dy shteteve shqiptare.
