Prokuroria e Tiranës ka përfunduar hetimet dhe ka dërguar për gjykim shtetasin libanez Fadi Alwan, i akuzuar për vrasjen e vajzës së tij 24-vjeçare, Rayyan Alwan. Sipas organit të akuzës, ai do të përballet me veprën penale “Vrasje në rrethana cilësuese”, e cila parashikon dënim me burgim të përjetshëm.
Ngjarja e rëndë ka ndodhur në Tiranë, ku viktima është gjetur e pajetë në një banesë me qira në rrugën “Gjon Muzaka”. Trupi i saj është tërhequr së fundmi nga Instituti i Mjekësisë Ligjore, ndërsa hetimet kanë zbardhur dinamikën e krimit tronditës.
Sipas dosjes hetimore, Fadi Alwan kishte mbërritur në Shqipëri së bashku me të bijën më 19 shkurt, duke mos i treguar askujt identitetin e tyre dhe duke u vendosur në një apartament me qira në katin e tretë të një godine. Aty dyshohet se ka ndodhur edhe krimi, ku ai e ka vrarë vajzën me thikë brenda dhomës së banesës.
Pas ngjarjes, ai është larguar nga Shqipëria drejt Athinës me avion, përpara se trupi i viktimës të zbulohej. Më pas, sipas hetimeve, ka vazhduar lëvizjet e tij drejt Amsterdamit dhe më pas drejt Libanit, duke tentuar të shmangë autoritetet.
Autoritetet dyshojnë se ai ka marrë me vete pasaportën dhe telefonin e viktimës, në përpjekje për të fshehur gjurmët dhe për të mos u identifikuar menjëherë. Megjithatë, gjurmimi ndërkombëtar ka vijuar dhe vendndodhja e tij e fundit është lokalizuar në Liban.
Në bashkëpunim me Interpol, po vijojnë procedurat për arrestimin dhe ekstradimin e tij, ndërsa çështja pritet të gjykohet në gjykatat shqiptare për krimin e rëndë që ka tronditur opinionin publik.
