Ish-presidenti amerikan Bill Clinton u paraqit të premten, më 27 shkurt, për të dhënë dëshminë e tij të shumëpritur përpara Komitetit të Mbikëqyrjes së Dhomës së Përfaqësuesve, në Chappaqua të Nju Jorkut, lidhur me hetimet që kanë të bëjnë me Jeffrey Epstein. Seanca u zhvillua me dyer të mbyllura dhe pa praninë e mediave, por Clinton publikoi një deklaratë hyrëse të fortë në rrjetet sociale në momentin që dëshmia nisi.
Në deklaratën e tij, Clinton theksoi se ishte paraqitur për dy arsye kryesore: dashurinë për vendin dhe parimin se askush nuk është mbi ligjin, përfshirë edhe ish-presidentët. Ai u ndal veçanërisht te fakti që bashkëshortja e tij, ish-Sekretarja e Shtetit Hillary Clinton, ishte thirrur për të dëshmuar një ditë më parë, duke e cilësuar këtë veprim si të padrejtë dhe të panevojshëm.
Sipas tij, Hillary Clinton nuk ka pasur asnjë lidhje me Jeffrey Epstein, nuk ka udhëtuar kurrë me të dhe nuk ka vizituar pronat e tij. Clinton këmbënguli se përfshirja e saj në këtë proces nuk kishte asnjë bazë reale.
Ish-presidenti përsëriti gjithashtu se nuk kishte pasur dijeni për krimet e Epstein dhe mohoi çdo përfshirje apo sjellje të paligjshme. Ai deklaroi se, pavarësisht fotove apo spekulimeve, nuk kishte parë dhe nuk kishte bërë asgjë të gabuar. Clinton shtoi se, po të kishte pasur qoftë edhe dyshimin më të vogël për veprimtarinë kriminale të Epstein, do ta kishte denoncuar vetë.
Gjatë fjalës së tij, ai nuk kurseu kritikat ndaj komitetit, duke paralajmëruar se disa përgjigje mund të ishin zhgënjyese për shkak të kalimit të kohës, por theksoi se do të përgjigjej vetëm mbi bazën e fakteve që kujtonte dhe pa spekulime.
