Dhjetë persona kanë humbur jetën dhe mbi 25 të tjerë janë plagosur pas një sulmi të armatosur masiv, që po cilësohet si një nga më të përgjakshmit në historinë e Kanadasë. Ngjarja ndodhi të martën, më 10 shkurt, në qytetin e vogël Tumbler Ridge, në verilindje të Britanikës së Re, sipas njoftimeve të Policisë Mbretërore Kanadeze (RCMP).
Policia u njoftua për të shtëna rreth orës 13:00. Gjashtë persona u gjetën të vrarë brenda Shkollës së Mesme Tumbler Ridge, ndërsa një tjetër ndëroi jetë gjatë transportit në spital. Dy viktima të tjera u gjetën të vdekura brenda një banese në komunitet. Autoritetet konfirmuan se autori i sulmit ishte njëri nga gjashtë personat e gjetur të vdekur brenda shkollës, i cili kishte kryer vetëvrasje.
Identitetet e viktimave nuk janë bërë publike deri tani. Dy nga të plagosurit u transportuan me helikopter në spital me lëndime serioze ose kërcënuese për jetën, ndërsa rreth 25 persona të tjerë po vlerësohen dhe trajtohen në qendrën mjekësore lokale për lëndime jo-jetëkërcënuese.
Kryeministri i Britanikës së Re, David Eby, shprehu ngushëllimet e tij për familjet e viktimave dhe premtoi mbështetje të plotë për komunitetin, duke e cilësuar ngjarjen si një tragjedi të papërshkrueshme. Autoritetet kanë nisur hetimet për zbardhjen e plotë të ngjarjes, ndërsa ky sulm konsiderohet i dyti më i përgjakshëm në historinë e sulmeve ndaj shkollave në Kanada.
Policia po vazhdon të mbledhë dëshmi dhe të ndërmarrë të gjitha masat për të kuptuar motivet e sulmuesit dhe rrethanat e ngjarjes. Komuniteti i Tumbler Ridge po përballet me tronditje të thellë pas kësaj ngjarjeje dramatike.
