Ai është një mashkull, që u bë i pasur dhe i famshëm falë fizikut të tij legjendar, por duket se aktori nuk ka aq shumë besim në vetvete. Arnold Schwarzenegger është shprehur se nuk ka qenë kurrë i lumtur me trupin e tij dhe se ai vuan nga mungesa e besimit.
69-vjeçari shton se problemi është bërë ende më serioz me kalimin e viteve, pasi e ka të pamundur të vazhdojë të ketë një fizik perfekt.
Në një intervistë të dhënë së fundmi për “Cigar Aficionado”, aktori u shpreh: “Kur shihem në pasqyrë, më vjen për të vjell. Kam qenë gjithmonë kritiku më i madh i vetes, madje edhe kur kisha një trup të mirë. Asnjëherë nuk jam ndjerë perfekt. Gjithmonë i ka munguar diçka trupit tim. Mund të gjeja miliona gjëra gabim tek vetja, të cilat më bënin të shkoja sërish në palestër”.
Aktori, i cili ka një vlerë prej 300 milionë dollarësh, kishte trupin më të famshëm në botë kur nisi të luante filmat “Predator”, “The Terminator” dhe “Red Heat”.
Burimi: Daily Mail
