Dy të rinj kanë humbur jetën në mënyrë tragjike pas një aksidenti me motor në afërsi të urës së ish-Bllokut në Tiranë.
Viktimat Kejdi Halili 21 vjeç dhe këngëtari 22-vjeçar Ergi Dini, i cili ka marrë pjesë në “X Factor”, dolën jashtë rrugës kur drejtuesi i motoçikletës humbi kontrollin.
Pavarësisht ndihmës së parë mjekësore, ata nuk munden dot t’i mbijetojnë plagëve të rënda të marra. Dy të rinjtë udhëtonin me motoçikletë pa kaska mbrojtëse dhe për këtë shkak gjatë përplasjes në tokë kanë marrë plagë të rënda në kokë.
Ergi Dini ka lindur në Shkodër dhe ishte vëllai i këngëtares së njohur, Barbana Dini. Që në fillimet e karrierës së tij, ai u dallua për një fuqi mahnitëse vokali dhe një timbër mjaft të veçantë.
Karriera e Ergit në muzikë nisi fillimisht në festivalet për fëmijë, ku këndonte si solist, më pas në shkollën “Jordan Misja” dhe në vitin 2013 ku hodhi hapat e parë me pjesëmarrjen në X Factor Albania, prej ku doli edhe fituesi i edicionit me mentore Altuna Sejdin.
Pas shpalljes fitues, Ergi publikoi “Morphine”, që ishte videoklipi i parë i tij, i kuruar me shumë kujdes dhe që u prit mirë nga publiku. Më pas ai konkurroi në “Kënga Magjike” me këngën “Pa frymë” dhe në prill të vitit 2016 publikoi një tjetër videoklip me titull “Asnji gram”.
Pak ditë më parë ai kishte kaluar disa ditë pushimi në Itali së bashku me motrën, Barbanën, me të cilën ishte shumë i lidhur. Përpos muzikës, 22-vjeçari merrej edhe me biznesin e tij të sapongritur, një agjenci udhëtimesh.
