Vijon të thellohet bilanci i tërmetit në Turqi dhe Siri, shkon në 37,457 numri i viktimave.
Autoritetet turke raportojnë se 31,643 persona kanë humbur jetën në vend, ndërsa sipas të dhënave nga qeveria siriane, numri i viktimave atje është 5,814.
Kërkimet e dëshpëruara për të mbijetuarit e tërmetit po hyjnë në orët e tyre të fundit dhe ekspertët thonë se shpresat për të mbijetuar janë ulur duke pasur parasysh kohën që ka kaluar që kur ra tërmeti. Kushtet atmosferike kanë ulur gjithashtu shpresat për të gjetur të mbijetuar.
Grupi opozitar i Mbrojtjes Civile Siriane, i njohur si Helmetat e Bardha, është duke mbajtur një periudhë zie shtatë ditore në Siri. “Ne do të mbajmë flamujt në gjysmështizë, duke filluar nga sot, më 13 shkurt për të mbajtur zi për viktimat e tërmetit në Turqi dhe Siri”, shkroi grupi në Tëitter vonë të hënën.
Sakaq ditën e djeshme (e hënë), 13 shkurtin qeveria shqiptare e ka shpallur ditë zie kombëtare, në shenjë solidarizimi me të dyja shtetet (Turqi dhe Siri) të prekura nga tërmeti tragjik.
Me herët xhiron e rrjetit e bëri një video e dhimbshme nga Siria, ku një foshnje e sapolindur u gjet nën rrënoja. Ajo ishte ende e lidhur me kordonin e kërthizës së të ëmës, që kishte ndërruar jetë.
Babai i foshnjës gjithashtu kishte vdekur nën rrënojat e shtëpisë, së bashku me katër fëmijët e tjerë.
Forcat e kërkim-shpëtimit e gjetën bebushen më shumë se dhjetë orë pas tragjedisë dhe nxituan ta mbështjellin me batanije e ta shpëtojnë.
Ajo u dërgua në spital, ku iu dha ndihma e shpejtë ndërsa mjekët treguan se bebushja kishte të çara e mavijosje në trup. Madje, nga i ftohti kishte ballin dhe gishtërinjtë të nxirë.
