Disa javë pas funeralit të Mbretëreshës Elizabeth II, është publikuar fotoja e parë e familjes mbretërore, me në krye Mbretin e ri të Britanisë së Madhe, Charles III.
Në foton e bërë në Pallatin Buckingham shfaqen duke pozuar krah për krah, Mbreti dhe bashkëshortja e tij, Camilla, Princi William dhe Princesha Kate Middleton.
Si fotoja e parë zyrtare e familjes mbretërore u vu re mungesa e Princit Harry-t dhe bashkëshortes së tij Meghan Markle. Në një kohë kur dyshja, lanë pas mosmarrëveshjet me familjen mbretërore dhe u shfaqën në Londër në funeralin e Mbretëreshës, u mendua si një hap për rregullimin e këtij raporti.
Por, mesa duket gjithçka ka mbetur aty dhe Duka dhe Dukesha e Sussex-it po vazhdojnë jetën e tyre larg tyre. Ndonëse është publikuar së fundmi, fotoja në fjalë është bërë pak para se të vinin krerët e shteteve më 18 shtator përpara funeralit të Mbretëreshës.
Kujtojmë që vdekja e Mbretëreshës Elizabeth solli ndryshime të mëdha në linjën e pasardhësve mbretërorë.
Duke qenë se Princ Harry dhe Meghan Markle hoqën dorë nga të drejtat mbretërore duke u shpërngulur në Shtetet e Bashkuara të Amerikës, u përfol gjatë mbi titujt që do të marrin fëmijët e tyre.
Sipas një dekreti të vitit 1917 nga Mbreti George V, Archie dhe Lilibet teknikisht morën titullin “princ” dhe “princeshë”. Kjo pasi ato janë nipër të monarkut aktual në fronin e familjes mbretërore britanike.
Deri këtu mirë! Mirëpo, ndonëse Mbreti Charles III është gjyshi i fëmijëve të Princ Harry-t, të vegjlit sërish nuk do të munden të marrin titullin HRH.
Kjo situatë duket se i ka shqetësuar shumë Dukën dhe Dukeshën e Sussex-it, të cilët janë shfaqur të frustruar ndaj Mbretit Charles.
