Një shqiptare është një nga vajzat më të shpejta të botës pas performancës të mahnitshme të Luiza Gegës. Ajo u u rendit e 5-ta në finalen e Botërorit të Atletikës, në garën 3000 metra me pengesa.
“Në pistë, Luiza sërish tregoi që është sportistja më e mirë shqiptare, duke dhënë kohën 9:10.04 dhe automatikisht rekord i ri kombëtar në këtë disiplinë. Madje Gega e ul rekordin me më shumë se 4 sekonda, çka do të thotë se koha e realizuar në Botëror është fantastike”- shkruan Olympic Albania.
Rekordi i mëparshëm në këtë disiplinë mbahej po nga Gega me kohën 9:14.29 dhe u vendos më 1 korrik në Lojërat Mesdhetare, Oran 2022.
“E 5-ta në botë! Rekord i ri kombëtar 9.10.04. Kjo foto thotë çdo gjë, jam kaq e lumtur,” – u shpreh Luiza në Instagram.
View this post on Instagram
Luiza Gega është atletja më e njohur shqiptare. Ajo mban rekordin në vrapimin 800, 1500 dhe 3000 metra. Në vitin 2019 ajo u bë atletja e parë shqiptare që kualifikohet në një finale të kampionatit botëror. Ajo e realizoi objektivin fillestar në garën e 3 000 metrave me pengesa në Katar.
Disa nga arritjet e saj kryesore përmendim: Kampionati Europian Paris 2011 në 800 metra ka rezultatin 2:08:34 sekonda; Kampionati Botëror Koreja 2011 në 800 m, vendi 20 me rezultatin 2:03”11 sekonda; Kampionati Ballkanik (Indoor) Stamboll, në 1500 m, vendi parë, medalje ari, me rezultatin 4:10:75 sekonda.
