Programi më i ri i “Top Channel” “Ëndërrtjerrësit” na ka kujtuar me nostalgji jo vetëm momente të bukura të fillimeve të yjeve të medias, por edhe disa nga periudhat më të vështira që i është dashur stafit të kalojë.
Një ndër këto çaste ka qenë padyshim edhe ndarja nga jeta e Dritan Hoxhës, themeluesit të “Top Media”, i cili ka përkuar edhe me periudhën që “Big Brother 1” ishte duke u transmetuar.
Moderatorja Arbana Osmani ka kujtuar mbrëmjen e djeshme momentin kur ai ndërroi jetë dhe ajo duhet t’ia jepte këtë lajm banorëve.
“Humbja e Tanit na ka prekur jashtëzakonisht shumë të gjithëve. Më duhej të ikja ta jepja këtë lajm te banorët, ndërkohë që vetë isha e tronditur. Ishim të tronditur, jo vetëm se kishim humbur një njeri që na udhëhiqte, me të cilin kishim ndërtuar këtë ëndrrën tonë, por me humbjen e tij na u duk sikur humbëm busullën”, rrëfeu ajo.
“Si pasojë e një aksidenti, Presidenti i Top Medias, zoti Dritan Hoxha ka vdekur”, -ndau ajo lajmin me banorët, të cilët thanë që, edhe pse nuk e njihnin personalisht, ishin të tronditur nga lajmi duke u bazuar në frytet dhe produktivitetin e punës së tij ndër vite.
“Big Brother donte dhe dy javë të mbaronte dhe ne nuk e dinim si do të shkonte. Thoshim çfarë do të bëjmë pa Tanin, për çfarë do të shkojmë më në punë”, -përmbylli Arbana.
