Drejtori rajonal paralajmëron se pavarësisht shpresave që varianti Omicron do ta bëjë COVID-19 një sëmundje endemike më të menaxhueshme, ky patogjen mund të vazhdojë të pësojë mutacione.
Varianti Omicron e ka futur pandeminë COVID-19 në një fazë të re dhe mund të sjellë fundin e saj në Europë, tha të dielën drejtori i OBSH-së për Europën.
“Ka mundësi që rajoni po shkon drejt fundit të pandemisë,” tha Hans Kluge për AFP në një intervistë, duke shtuar se Omicron mund të infektojë 60 përqind të europianëve deri në muajin mars.
Sapo të përfundojë rritja aktuale e rasteve të Omicron që aktualisht po përfshin Europën, “do të ketë një imunitet global për disa javë dhe muaj, ose si rrjedhojë e vaksinës ose për shkak se njerëzit do të kenë imunitet për shkak të infektimit, si dhe gjithashtu për shkak të uljes së sezonalitetit”.
“Pra, ne parashikojmë që do të ketë një periudhë qetësie përpara se COVID-19 të mund të rikthehet në fund të vitit, por kjo nuk do të thotë domosdoshmërisht se do të rikthehet pandemia”, tha Kluge.
Studimet kanë treguar se varianti Omicron përgjithësisht shkakton infektim më pak të rëndë sesa varianti Delta, të paktën te njerëzit e vaksinuar. Kjo ka rritur shpresat e shumëpritura që COVID-19 ka filluar të kalojë nga një pandemi në një sëmundje endemike që mund të menaxhohet si grip sezonal.
“Flitet shumë për sëmundje endemike, por endemike do të thotë… që është e mundur të parashikohet se çfarë do të ndodhë. Ky virus na ka befasuar më shumë se një herë, kështu që duhet të jemi tepër të kujdesshëm”, tha Kluge.
Në rajonin e Europës të OBSH-së, i cili përbëhet nga 53 vende, duke përfshirë disa shtete të Azisë Qendrore, Omicron përbënte 15 përqind të rasteve të reja që nga 18 janari, krahasuar me 6.3 përqind një javë më parë, tha organizata shëndetësore.
/ France 24
