Skandalet në Shqipëri janë bërë aq të zakonshme sa askujt nu ki bën më përshtypje fakti se institucionet kanë dështuar në mbrojtjen e sigurisë dhe jetës personale të qytetarëve.
Pak parta zgjedhjeve të 25 prillit u publikua skandali i “patronazhistëve”. Të dhënat e mbi 900 mijë qytetarëve ishin “në duart” e personave të quajtur “patronazhistë” dhe këta të fundit kishin detyrë të zbulonin se me cilën parti, kë votonte apo prirjet politike të personit nën patronazh.
Kur për këtë skandal faji mbetet ende jetim, një tjetër ka dalë në dritë dy ditët e fundit. Bëhet fjalë për rrjedhjen e të dhënave me pagat e qindra mijëra qytetarëve. Dje ishin pagat e muajit janar 2021, sot e kanë pasur radhën pagat prill 2021 dhe numrat e telefonit.
Por natyrisht që ky skandal vjen në kohën e duhur për të mbuluar një skandal tjetër. Bëhet fjalë për skandalin e inceneratorëve.
Vetëm pak kohë më parë arrestime të bujshme ndodhën, ndër to edhe ish-ministri i Mjedisit Lefter Koka, i akuzuar për korrupsion. Ndërkohë, në kërkim është shpallur Klodian Zoto dhe Stela Gugallja, “biznesmenët” e inceneratorëve.
SPAK bëri me dije se arrestimi i Kokës lidhet me ndërtimin e inceneratorit të Elbasanit, ku ai në cilësinë e ministrit të Mjedisit ka shkelur procedurat për dhënien e licencës dhe miratimin e vijimit të ndërtimit të objektit, ndërsa dy personat e tjerë, akuzohet se kanë pastruar para dhe kanë dhënë rryshfet në dretim të Kokës me qëllim sigurimin e lejes për ndërtimin e inceneratorit për të gjeneruar më pas fatura fiktive duke u vjedhur shtetit rreth 3.6 milion euro.
Në një moment të tillë, një skandal që prek gjithësecili personalisht për të tërhequr vëmendjen do të ishte perfekt. Dhe kjo pikërisht ndodhi.
Nuk përjashtohet aspak mundësia që të dhënat të kenë rrjedhur nga vetë AKSHI. Inxhinieri i IT, Genti Progni tha ditën e djeshme në një intervistë për “ABC Neës” se të tilla të dhëna të tilla mund të dalin vetëm nga AKSHI, pasi është i vetmi institucion që mund të mbledhë e të eksportojë sasi të tillë të dhënash. Progni ka treguar më tej se edhe nëse diçka e tillë do të kishte ndodhur nga jashtë, apo nëse dikush i brendshëm do të përpiqej të eksportonte të dhëna, AKSHI do të njoftohej automatikisht.
Me pak fjalë, pa faj çdokujt mund t’i krijiohen dyshime për mënyrën se si këto të dhëna dolën. Në cilindo nga skenarët, AKSHI ka dështuar në detyrën e vet dhe nuk ka arritur t’i mbrojë të dhënat e qytetarëve.
