Pas patronazhistëve tashmë është zbuluar edhe një tjetër skandal me të dhënat personale të qytetarëve shqiptarë.
Në “WhatsApp” dhe rrjete të tjera sociale po shpërndahet me shpejtësi një databazë me të dhënat e qytetarëve të punësuar në sektorin privat dhe publik, shoqëruar me kartat e tyre të identitetit, pozicionin e punës dhe rrogën përkatëse.
Në listë janë mbi 600 mijë qytetarë të punësuar jo vetëm në sektorin publik por edhe atë privat, të shoqëruar me kartat e tyre të identitetit.
Kjo është një shkelje flagrante e të dhënave personale të qytetarëve shqiptarë, që kërkon një hetim të thellë dhe dënimin e autorëve.
Kryeministri Rama sot i bëri thirrje i Prokurorisë të kryejë një hetim të imtësishëm mbi këtë ngjarje.
Ai theksoi se publikimi i pagave të 600 mijë shqiptarëve mund të jetë një përpjekje destabilizuese duke pasur parasysh, sipas tij, deklaratat e bëra nga foltoret e kuvendeve të antikuvendeve.
“Sot ju kemi ftuar për të folur për ngjarjen e qarkullimit të të dhënave mbi pagat e qytetarëve shqiptarë. Në radhë të parë dua t’iu kërkoj një ndjesë të gjithëve që janë shqetësuar me të drejtë për këtë ndërhyrje në këtë aspekt të jetës së tyre private. Ndërkohë dua ta nënvizoj që në fillim se kjo është një ngjarje, e cila meriton të hetohet imtësisht. Uroj, shpresoj dhe ju bëj thirrje organeve ligjzbatuese që ta kryejnë këtë hetim me të gjithë kapacitetet e tyre. Nga ana tjetër, dëshiroj të ndaj me publikun se në këndvështrimin tim nuk është e vështirë të shohësh se këtu ka një qëllim jo fort të vështirë për të krijuar konfuzion dhe për të nxitur destabilitet, në një përpjekje që nuk është e para.
Duke pasur parasysh edhe deklarata të bëra nga foltoret e kuvendeve të antikuvendeve mund të mos jetë e fundit, prandaj thirrja ime për prokurorinë është që të hetojë, duke kërkuar që të përgjigjen jo vetëm të gjithë pa përjashtim inspektorët e Tatimeve, që kanë akses në sistemin e pagave për arsye të punës, ata që aktualisht punojnë në këtë sistem, apo të tjerë që mund të jenë larguar nga ky sistem në periudhën nga të dhënat e nxjerra deri sot, por edhe ata që nga foltoret e kuvendeve të antikuvendeve paralajmërojnë zymtyra të tjera”, u shpreh kryeministri Rama.
