Angela Merkel ndodhet sot në një vizitë zyrtare në Tiranë, e cila është vizita e saj e fundit në postin e kancelares gjermane.
Ajo u prit rreth orës 10:00 të paradites së sotme në një ceremoni zyrtare nga kryeministri Edi Rama në Pallatin e Brigadave, mirëpo në momentin kur lideri shqiptar do e përshëndeste, ai i shtriu dorën duke i harruar rregullat e mbrojtjes nga Covid-19.
Ama kancelarja Merkel ndryshe nga kryeministri Rama, për asnjë çast nuk i harroi rregullat për mbrojtjen nga koronavirusi. Liderja gjermane i drejtoi grushtin Ramës si formë përshëndetëse dhe më pas vijuan së bashku rrugën drejt vendit të përcaktuar nga organizatorët shqiptarë për këndimin e himnit të flamurit.
Pas një takimi rreth 40 minutësh me Ramën, Merkel do të zhvillojë një takim në Tirana Bussiness Park edhe me kryeministrat e gjashtë vendeve të rajonit: Shqipërisë, Bosnjës dhe Hercegovinës, Malit të Zi, Serbisë, Kosovës, Maqedonisë së Veriut. Në fund të këtyre takimeve, Merkel do të mbajë një konferencë të përbashkët për shtyp me kryeministrin Rama që pritet të nisë rreth orës 14:30.
Kjo vizitë e kancelares gjermane në vendin tonë vjen në kuadër të procesit të Berlinit dhe ka si synim forcimin e bashkëpunimit rajonal.
Pas afro 16 vitesh në pushtet, kancelarja gjermane Angela Merkel do të tërhiqet zyrtarisht nga detyra në fundit të mandatit të saj të katërt. Në Gjermani kanë nisur prej kohësh diskutimet se cili do të jetë politikani që do të arrijë të marrë në dorë frerët e vendit.
