Ndeshja mes Danimarkës dhe Finlandës për Euro 2020 e zhvilluar ditë më parë u ndërpre për shkak se futbollisti Christian Eriksen u rrëzua papritur në mes të fushës duke humbur ndjenjat. Në minutën e 43-të, Eriksen u afrua për të marrë topin dhe papritur u rrëzua duke trembur të gjithë kolegët e tij.
Së fundmi është mësuar se pas atakut kardiak të pësuar, mesfushori i Danimarkës, tashmë do i nënshtrohet një operacioni në zemër.
Nëpërmjet një komunikate zyrtare, Federata e Danimarkës, ka njoftuar se pas testeve të zemrës të kryera, Eriksen tashmë do ketë një operacion, ku në zemër do i vendoset një defribilator. Kjo pajisje është e nevojshme, për shkak të shqetësimeve me ritmin në zemër.
“Pasi Eriksen ka kaluar në ekzaminime të ndryshme të zemrës, është vendosur që ai duhet të ketë një ICD (defribilator). Kjo pajisje është e nevojshme pas një sulmi kardiak për shkak të shqetësimeve të ritmit. Christian ka pranuar zgjidhjen dhe plani është konfirmuar për më tepër nga specialistë në shkallë vendi dhe ndërkombëtar të cilët rekomandojnë të gjithë të njëjtin trajtim. Ne inkurajojmë të gjithë që t’i japin Christian dhe familjes së tij paqe dhe privatësi herën tjetër”, shkruhet në komunikatë.
Christian Eriksen është më mirë dhe vetë futbollisti, e konfirmon diçka të tillë, përmes një postimi në rrjetin social “Instagram”. I shtrirë në shtratin e spitalit, mesfushori danez ka falënderime për të gjithë.
“Përshëndetje të gjithëve. Faleminderit shumë për urimet dhe mesazhet tuaja të ëmbla dhe të mahnitshme nga e gjithë bota.
Kjo do të thotë shumë për mua dhe familjen time. Jam mirë, në këto rrethana. Më duhet të bëj ende disa kontrolle mjekësore në spital, por ndihem mirë. Tani do të bëj tifozllëk për djemtë e Danimarkës në ndeshjet e radhës. Luaj për të gjithë Danimarkën. Më të mirat!”, shkruan Eriksen në postimin e tij.
View this post on Instagram
